أجي نعاود ليك : خيرية أف مدينة بوعرفة دايرة ريكلامْ فزواج

أجي نعاود ليك : خيرية أف مدينة بوعرفة دايرة ريكلامْ فزواج



خيرية أف مدينة بوعرفة دايرة ريكلامْ فزواج



بلافران / احميدة بوربوغا


في السنوات الأخيرة إنتشرات واحد الظاهرة خطيرة فالمغرب، والتي كتهدّد البنية ديال المجتمع والتركيبة ديالوا، هكدا نكونوا كنهضروا على ظاهرة الّي كيسميوها عزوف الشباب عن الزواج، وهاد الظاهرة أيظا عندها علاقة بالتحولات ديال العصر الحالي وكذا الطريقة باش كيفكروا الشباب ديال اليوم والّي هما وصلوا إلى حشمنا نقولوا تعداوْ سن الزواج ومبغاوش إتزوجو... بطبيعة الحال كاينين بزّاف ديال الأسباب الّي كتخلِّي الشباب يتخدوا بحال هاد القرارات الخاوية من الزواج محيت حتى واحد مكره إتزوّج، غدي نذكروا الشوماج حيت النسبة ديالوا مرتفعة فالمغرب، وكاتجي موراه قلة الشّي أو الفقر وهو سبب رئيسي كيساهم بشكل كبير فتنامي هاد الظاهرة ولبْلان كيكون واضح مزيان فاش كتسوّل شي شاب علاش متزوجتش، كيقولّيك مقادش براسي نزيد عاد نتزوّج ... وكاين السبب الثاني حتى هو مهم مرتبط بالغلاء ديال الصداقْ، كيفما كيعرف الجميع ان الأغلبية ديال العائلات في المجتمع ديالنا كيطلبوا بواحد الثمن كبير أف الصداق ديال بنتهم، وراه نيت صداق داير حالة كيطلع مع الأورو، والشاب فاش كيمشي إخطب شي بنت غير إدير رجلوا أف العتبة ديال الباب كيهبطوا عليه بالشروط. فمثلا كتقولّيه البنت الِّي هو جاي إخطبها تجيبلي بيت نعاس من أوزبكستان حتى كيبقى إسوّل على هاد البلاد فين جات، وتجيبلي الدقايقية والشيخات باش نبانوا شوية على الجيران ويبقاوْ عليه بالشفوي حتى إدرّوا راسوا كيمشي مسكين مدمدم مابقاش إعاوْد إفكّر أف شي زواج ، وباش منساوش كاينين شي أسباب أخرى كيساهموا أف نموْ هاد الضاهرة مثلا كتلقا شي بنات كيرفضوا باش إتزوجوا غير باش إكملو قرايتهوم أو لا مازالين صغار إعيشوا حياتموه... وكاين شي شباب كيقولك منتزوّج حتى نبني المستقبل ديالي، وراه معمروا إبنيه حيت الطوبية مابقاتش كتصنع أف المغرب كيجيبوها من برّا... وكنلقاوْ شي ناس فات ليهوم تران عندهوم كتر من 40 عام مازال ملقاش بنت الناس قالِّيك أسيدي بغاها زعرة وهو كحل دايرْ كي جَّحْموم .. وكايجي الطلاق باش إكمّل الديكور أيزيد إزرع الخوف أف الشباب وكايخليهوم إهربوا على الزواج، راه إلى جينا لمعقول مع هاد المدوّنة أف لبلاد نلقاوْهوم عندهوم الحق أجي دابا تزوّج من بعد طلّق وتصدقْ حياتك كاملة معلّق .. هادشي الّي كنهضرو عليه عندو نعكاسات وأثار سلبية على المجتمع من جهة وعلى الشباب من جهة أخرى، هاد الإنعكاسات كتجلى في انتشار الرذيلة والفواحش والعلاقات المحرَّمة بالنسبة للطبقة الغنية أمّا الطبقة الكادحة من الشباب كيلتاجؤو لشي عادة خايبة شرحناها مزيان أف ملحق ديال بلا حشمة.. الهضرة كثيرة فهادشي ديال الزواج وطْلاق .. والأهم الِّي بغيت نتكلّم عليه فهاد البلبلة كلها والّي عندوا علاقة بالظاهرة الّي كنتكلمواعليها، أسيدي علمات بلا فران أن واحد الخيرية كتواجد أف مدينة بوعرفة دايرة ريكلام أف الزواج بالنسبة للشباب الّي مافحلهومش وبغاوْ إتزوجوا من النزيلات ديال الخيرية كيما جا على لسان واحد المسؤول أف الخيرية قالِّيك أسيدي باش نحاربوا هاد الضاهرة ديال عزوف الشباب عن الزواج فكرنا باش نديروا هاد الريكلام الأول أف لبلاد والصداق فيه قليل والشروط ساهلة .. الصداق ثمن رمزي مكيتعداش 18 ألف درهم بالإظافة الى كونطرا دالْكّرانتي فيها 5 سنين كتسنييها معا البنت الِّي خطاريتيها من بين البنات ديال الخيرية من بعد إلى معجباتكش أوْلا متفهمتوش تقدر تفاك منها بكل سهولة بلاما تابعك قضائيا أف القضية وبلاما طبّق عليك قوانين المدوّنة هادشي كوّلوا موجود أف الكونطرا ديال البيع أو الزواج .. بصراحة هاد العرض ديال خيرية لْمغرب زويين وكان غادي إكون حسن إلى كانت غادي تزوّج بواحد البنت أيعتيوك واحدة أخرى فابور.. وهادشي كولُّوا والّي بغينا نأكدوا عليه هو أننا مكندروش إشهار لهاد الخيرية ولكن كنقوليك أجي نعاوْد ليك أشْ واقعْ أف لبلاد.