" كيف كنت خليك" ( زجل)

كيف كنت خليك


محمد اجنياح


عنادك واعر
غرورك قاهر
من واهلي صابر
عييت نقاوم فيك.

لهواك صايم
جوعي ليك دايم
ف وهامي هايم
عشقي مؤبد فيك.

عطفي لا تجافي
نصفي لا تحافي
يا ولافي
كيف كنت خليك.

حلامي هبال
همومي جبال
هاد لحمل ثقال
علي وعليك.

ف رحابك البعيده
طريقي طوال
و مات الحب ف القصيده
ب قلام و كلام ردال
و طاحت محاين جديده
علي وعليك
وطاح الضيم بالجهر.




خوله:
ف عقبة الحال
صعابت الطلعه،
و ف حدورة المحال
طاحت شحال من دمعه
ع الخد المدبال
وطعنت لحلام ف الظهر.

وطاحت شحال من خلعه،
وطاحت شحال من سمعه،
وتعلق حجامنا بحبال الغدر.

وطاح الهم مدلي جلال
وسال الدم شلال
من جراح الصبر.

خولة:
كيف كنت خليك،
فلته ف زمان
رمادو جمر،
حلمه
للعاشق فجوف الفجر.

كنت مناره
ف ظلام ليلو بحر
كنت شلا وشحال
يا خساره
كنت كتر.

خوله:
مال ضوك طافي
مال حالك حافي
مال حظك
ف طريقي عثر.
خوله:
النادي عليك
فكي هاد اللغز
خيوط سكاتو خبال
ربات فينا عكز
ونسخت منا رذال
بيهم سقفنا قطر.

خولة:
فكي خبال
هاد لغيار
زاد ف هم كانوني جمر.
مسحي العار
من جبين هاد الحاله،
طفي نار
ف دواخلي شعاله،
بالحكمه،والكلمه،
وردي البال
على حرف يعرف
ينصف يوصف
يكشف بالجهر،ويقر
على حروف
رضعت لغيال
من بزولة الخوف
و طاحت من السطر.

خوله العيطه عليك
جفي الدم اللي سال
ب سمغ وصلصال
و قلم عوال
عل الصبر.


خولة قادي كفوف
ميزان الحال
صروفو شحال مياله
ديما وزانها كسر،
من واهلي عواله
على شلا وشحال من غدر.