أغنى أغنياء المغرب

ديريكْت : أغنى أغنياء المغرب



بلافران



ربما أي واحد كيقول شكون هما مالين العاقة في المغرب، و كل واحد كا يسول و باغي يعرفهم و يعرف كي دارو وصل لجمع أموال ضخمة. في الحقيقة هما بزاف، إلى مشينا بداك المنطق ديال اللي خانز ، كما كا يشوفها المغاربة في أي مدينة كا تلقى العشرات.



اليوم حنا غا نحاولو نهدروا على الخانزين ديال هادوك اللي خانزين فلوس، ما يعني أغنى أغنياء المغرب، بالفعل المعلومات محدودة جدا، و نقدروا نقولوا منعدمة، و لكن غا نجيبو أسماء و نتكلمو عليها، هاد الأسماء راه بلا ترتيب، يعني يقدر إكون الأخير هو اللي أغنى من الأول و الوسطاني هو التالي، المهم القاسم المشترك أنهم خانزين بوسخ الدنية.



- أنس الصفريوي

أنس الصفريوي الطاشرون الكبير ديال لبلاد، مول مجموعة الضحى العقارية المعروفة، كا يتعتبر من بين العشرة الأوائل في المغرب من ناحية الثروة اللي عندوا، القيمة ديال الحصة ديالو في مجموعة الضحى تصل إلى 28 مليار ديال الدرهم ما يعني 3.5 مليار دولار، بلا ما نهدروا على الإستثمارات ديالو في حوايج أخرى بحال صناعة الورق و الكارتون، و النقل البحري و الصناعات الكيماوية. الصفريوي ولد مدينة فاس و تزاد في 1957، و ما قاريش بزاف خرج من الثانوية ، و مشى للخدمة مع باه، اللي كان بدوره من أكبر رجال الأعمال في بداية الإستقلال، و ملك الغاسول ديك الوقت.



- ميلود الشعبي

ميلود الشعبي أحد أشد معارضي، و العدو الأول إن صح التعبير لأنس الصفريوي(صدق من قال خوك في الحرفة عدوك)، و رجل الأعمال المثير للجدل في المغرب، صاحب المجموعة الإقتصادية يينا، اللي عندها مشاريع في المغرب، ليبيا، تونس، الإمارات. و صاحب الشعبي للإسكان، وفنادق رياض موغادور المعروفة أنها ما كتبيعش الكحول، و كذلك مول سلسلة متاجر أسواق السلام يعد من أكبر أغنياء المغرب تا هو، و كا يقولوا أن ثروته تصل ل 4 مليون أورو. ميلود شعبي ولد في بلدة شعبية قرب مدينة الصويرة، تا هو ما قاريش بزاف، حيث درس غير في المسيد شوية ديال القرأن و عرف يكتب الحروف العربية، و خرج للخدمة كمزارع و راعي للمعز، و اليوم هو أحد ناس العاقة لكبار في المغرب.



عائلة بنصالح -

هاد العائلة تعد تا هي من العائلات الغنية في المغرب و كا يقولو أن عندها 1.5 مليار درهم. و لكن هناك الذي يقول أن هاد الرقم قليل بزاف و العائلة تتجاوزه بالضعف تقريبا. و يعتبر محمد و مريم بن صالح هما القادة ديال هاد العائلة إقتصاديا. مريم بنصالح هي صاحبة مجموعة هولوماركوم، يرجع فضل ثروتها لوالدها الحاج عبد القادر بنصالح، إبن تافوغالت التي لا تبعد إلى 55 كلم على وجدة. و العائلة اليوم إلى كان شي حاجة خلتها تصنف في خانة أغنياء المغرب، فهي مياه ولماس، حيث تملكها هاد الفاميلة، و مياه ولماس تملك بدورها 60 في المائة من سوق المياه المعبأة في البلاد. هذا بدون الحديث عن المشاريع الأخرى و الأسهم اللي عندها في الأبناك المغربية و زيد عليها النقل الجوي، و شركات التأمين، و للمعلومة فإن الحسن الثاني كان أتاح 700 هكتار من الأراضي المسقية للحاج عبد القادر، أحد الموقعين على عريضة الإستقلال في 1944.



- إبراهيم زنيبر

إبرهيم زنيبر أو ملك الخمور بالمغرب، تا هو كا يتصنف من الناس الخانزين فلوس فهاد لبلاد، هاد الرجل الذي بدأ في السوق الأسبوعي ديال سيدي قاسم، اليوم يملك المجموعة الإقتصادية ديانا هولدينغ، التي تحتكر 85 في المائة من سوق الخمور في المروك، و اللي كا دخل ليه في السنة 225 مليار سنتيم، زنيبر كان مستشار للملك الحسن الثاني و داز كذلك على البرلمان، اشترى 740 هكتارا في سنة 1956 من أحد الفرانسويين أما اليوم فعندوا2500هكتارا أزيد من 2100 منها مخصصة للكورم اللي تتحول لأنواع كثير من الخمور. السيد اليوم من البورجاوزية ديال المغرب لفضل البلية ديال الناس و عشقهم لنبيذ و البيرة، كلما فتحت قرعة ديال فلاك سبيسيال في المغرب كلما الكونط ديال زنيبر كا يتزاد.



- عثمان بن جلون

السي عثمان بن جلون اللي قال في أحد تصريحاته الصحفية أنه لا يعترف و ما عندوش في القاموس شي حاجة سميتها التقاعد، هو أحد أغنياء المغرب لكبار، بن جلون المزداد في 1932 هو مول المجموعة المالية الضخمة فايننس كوم، اللي شاد 25 في المائة من سوق ديال التأمين بالمغرب، و كذلك البنك المغربي للتجارة الخارجية و الذي يمثل شي 16 في المائة من النشاط المصرفي بالمغرب، و عندوا تا أسهم في شركة الإتصال ميديتيل، بن جلون تا هو بدأ بالتجارة مع خوه. اليوم ثروة عثمان بن جلون تتوصل 23 مليار درهم، عاشق لتربية الخيول، و للوحات الفنية، من حقوا إقول أنه ما عندوش فالراس التقاعد ، واش اللي راس مالو هادشي كولو غا يفكر فشي تقاعد.



- العائلة الملكية

العائلة الملكية، تا هي تعد من أغنى العائلات في البلاد، و حسب واحد التقرير ديال لوجرنال فإن ثروتها تعادل شي 9 مليار درهم ، و لكن هاد الرقم تزاد بشكل كبير في السنوات الأخيرة ، و من المعروف أنها تملك 18 في المائة من أونا. و للمزيد من المعلومات يمكن زيارة لانكيت الذي أعده بلافران في وقت سابق تحت عنوان شحال فرأس المال الملك محمد السادس. الرابط: http://www.blafran.com/modules/news/article.php?storyid=217

في الأخير راه الأسماء و العائلة اللي خانزين بوسخ الدنيا كثر و كاينين بزاف فهاد البلاد، و كاين ناس اللي معمرنا نعرفوا شحال عندهم و معمرنا نحلموا نوصلوا لشي معلومات على ممتلكاتهم، لأنه بكل بساطة تجارة المخدرات و في العشبة المغربية هي سبب ثروتهم و هادو منهم عدد، و يقدر إكون العاقة اللي عندهم أضعاف مضعفة ديال أصحاب العاقة اللي ذكرنا.



المهم خمسة م خميس و الله إزيدهم و يزيدنا، راه فهاد دريكت ما درناهش باش نضربو بنادم بالعين.