ديريكْت : واش اليهود مغاربة و لا لمغاربة يهود

ديريكْت : واش اليهود مغاربة و لا لمغاربة يهود



اليهود المغاربة شكون هما و منين جاو

و شكون اللي كيحميوهم و المراكز اللي وصلو ليها

واش بصح الأمازيغ هما في الأصل يهود..؟؟

بلافران/ أس سوماديل


الدخلة:
كلنا كنسمعو على اليهود المغاربة و عايشين معنا و كنديرو معهم حتى التجارة و كنتعملو معهم عادي و في البعض الأحيان كاع ماكنعرفوا أنهم يهود غير الى قالوها هما و حتى الى عرفناهم يهود كتبقى مسألة عادية تعودنا عليها، بلافران قرر ينبش فالموضوع و يبحث عن شكون هما اليهود المغاربة و منين جاو والمراكز اللي وصلو ليها و شكون اللي كيحميهم و العادات أو الطقوس ديالهوم و الأحياء اللي ساكنين فيها فالمغرب.


شكون هما اليهود المغاربة و منين جاو..؟؟
كينقسمو اليهود المغاربة لقسمين: المغوراشيم (و معناها بالعبرية المطارد) و اللي هما يهود الأندلس و الطشابيم و هما اليهود الأصليون اللي سكنو المغرب قبل الفتح العربي و جاو للمغرب من بعد ما سلب القدس من طرف تيتوس فعام 70 قبل الميلاد و كترجع الأسباب لقدومهم إلى شمال افريقيا حيت كانوا كيديرو التجارة مع القرطاجيين، و كيقولو أنه كان هناك استطانا يهوديا في المغرب كيرجع لعام 320 قبل الميلاد، و كاينين شي مؤرخين أفارقة كيقولو أن غانا كانت مملكة يهودية في القديم، و كاين بزاف من هاد الطشابيم اللي أصلهم أمازيغي اللي تأثروا بالديانة اليهودية اكثر من الأمازيغ المسيحيين اللي بقاو صامدين حتى القرن 11.و في بداية القرن الثامن فزمن الغزو العربي كانو شي ممالك يهودية صغيرة فالجزائر و المغرب و منهم وحدة كانت تأسست في سجلماسة و ثانية في منطقة الأوراس بالجزائر و اللي كانت كتحكم فيهم الملكة ديهية "الكاهنة" اللي قاومت الغزاة المسلمين لمدة 4 سنين و قتلوها فالمعركة، و تحالف ادريس الأول (أول حاكم مسلم في المغرب 788) مع اليهود ضد مؤيدي الخليفة العباسي هارون الرشيد لكن من بعد ولا ضدهم.
و المغوراشيم هما اللي طردوهم من اسبانيا و البرتغال من قبل فيرناندو و اسابيلا عام 1492 و على حسب بعض التقديرات كتقول أن الجالية اليهودية في المغرب فداك الوقت وصلو ل 100 ألف يهودي و تزاد عليهم تقريبا 30 ألف اللي جاو من اسبانبا و البرتغال، و كاين بزاف منهم لعندهم أسماء ديال مدن اسبانيا بحال مسلمين اللي كانو فالأندلس، و أغلبية ديال يهود جبل طارق و سبتة و مليلية هما أحفاد المطرودين من اسبانيا و البرتغال.
و يهود الأندلس تفرقوا فمدن كبرى و امتلكو معابد و بقاو منعزلين فأحياء منفصلة سموها من بعد بأحياء الملاح.

لغات يهود المغرب
يهود المغرب المعروف عليهم أنهم كيهدرو بزاف ديال اللغات و انقسموا ل 3 دالمجموعات: منهم مجموعة كتهدر الأمازيغية و اللي هما يهود من أصل أمازيغي أو يهود المغرب الأصليون، و كانو كيسكنو فجبال الأطلس، و مجموعة كتهدر الإسبانية و كانو كيسكنوا في الشمال، و اللي هما أحفاد اليهود اللي مطرودين من الأندلس و مجموعة أخرى كيهدرو العربية والدارجة المغربية، أما اللغة العبرية فبقات هي اللغة ديال الدين و العبادة و بقات لغة خاصة كيهدروها غير فديورهم مع عيالاتهم و كانو اليهود كيعيشوا هاد الإزدواجية بين هدرة ديال الخدمة و الهدرة ديال الدار.
و اليهود المطرودين من الأندلس عندهم لهجة أخرى اسمها لادينو و هي ممزوجة بين العببرية و الإسبانية و كانو كيتفنو حتى العربية.
و مع مرور الوقت انتقلو بزاف دالمفردات من العيبرية للدارجة المغربية اللي منهم بزاف دالكلمات برتغالية و اسبانية، و لما دخل الفرنسيس للمغرب و استعمروا لبلاد ليهود هما لوالا اللي تعلمو الفرنسية لغة الحاكم الجديد.

أعياد و طقوس اليهود المغاربة
كيعرف التراث اليهودي المغربي بصمات واضحة كدّل على مؤثرات ثقافية أمازيغية، و كاين مجموعة ديال الأعياد و الطقوس كتميزهم عن باقي اليهود، كالإحتفال بعيد ميمومنة فعلى حساب التقليد الأمازيغي و الراوايات القدام، هاد ميمومنة هي جنية عندها قدرات خارقة و كتقدر تحقق أي حاجة اتمناها الإنسان بحال ترد الأرض خضراء فوق الجفاف و كتزين الخايبات و كدجيب الرزق فحالة الى عرفو كيفاش يهدرو معاها و يرضوها، و كاين بزاف ديال اليهود اللي كيأمنوا بهادشي ديال السحر و الشعوذة خصوصا اليهود اللي من أصل أمازيغي و هندهم شي عادات ما يقدروش استغناو عليها بحال:
- كيعلقو 7 ديال الخيوط مختلفة الألوان في عنق المريض باش يجريو على العفايرت و جنون.
- و كيعلقو فالبيبان صفائح ديال الحديد على حساب العين الحاسدة و يبطلو السحر.
- و كيديرو الدمليج عند عتبة دالباب كيخويو فوسطو الحليب باش البنت تبقى زويبة ما تخيابش.
و كاين مجموعة من الأهازيج والأناشيد كتردد فالأمازيغية و الدارجة المغربية...
و من بين الأعياد ديالهم المقدسة و عندهم مكانة خاصة في انفسهم كنلقاو:
عيد الفصح اللي كيجي ف 15 أبريل فهو محطة مهمة ترسبات بعمق فالذاكرة اليهودية حيث بنو اسرائيل تمكنوا من اعتناق الحرية في مصر على يد موسى واخوه ابني عمران، من بعد ما كانوا كيعانيو من القصوة و الحكرة، و لما كيبدا يقرب الفصح فالمغرب كيبداو لعيالات (اليهوديات المغربيات) بالتنظيف وكيحرقو أي مادة فيها الخميرة بحال الخبز مثلا و كيتجمعو العائلات على مائدة كيتذكرو الماسي والأحزان و مرارة العبودية و الحرمان اللي مر بها بنو اسرائيل في مصر و كيبداو اقراو دعاء كيسمويه في المغرب بـ (الهاجادا) و هاهو نموذج منه بالأمازيغية:

tarula ay s neffagh gh " maser " …..
Ayddegh N ughrum ur imtinn da ttecan
Lewaldin nnegh gh" maser " …… kullu mad yagh
Lâz iddu ad itec, mad yagh fad iddu ad isu
asegwas ddegh gh tmazirt ddegh ;
Imal gh bit lmekdiss

و كيقولو بالدارجة المغربية مرفوقة بكلمات عيبرية:

(هاكذا قسم الله البحر على طناش لطريق منين خرجو جدودنا من مصر على يد موسى بن عمران حا كادوش باروخ حو من حاد إلكالوث...... ) و معناها بالعربية الفصحى:

هرولة خرجنا من مصر
خبزا غير مختمر أكلنا
أجدادنا في مصر كل من كان جائعا أكل
و من كان عطشانا شرب
هذا العام في هذا البلد
العام المقبل في بيت المقدس


عيد حانوكا اللي كيجي فيوم 25 من شهر "كسلاف" على حساب التقويم العبري و كيأرخ هاد العيد لفترة إنتصار اليهود بزعامة "المكابيين" اللي كان عددهم قليل على اليونان بالرغم من عددهم الكبير وطريق الإحتفال بهاد العيد كيجيبو شمعة كبيرة كيشعلوها نهار الأول و النهار الثاني كيشعلو جوج شمعات و فالنهار الثالث 3 ديال الشمعات و هكذا تاليوم الثامن اللي كيشعلو فيه 8 دشمعات و فنفس اليوم لعيالات ديالهوم كيوجدو السفنج و كيكلوه و هما مجموعين على ضوء الشمع.

عيد البوريم كيجي نهار 13 من اذار على حساب التقويم العبري و هاد العيد كيحيي الذكرى اللي فسرو فيها التوراة و فيه كيتذكرو اليهود اللحظة اللي تخلصو من شي شرير اسمه "هامان" و كيقراو القصة ديالو بزاف دالمرات كيف ما جات في التوراة، و كيمتاز هاد العيد على غيرو بالنشاط و الضحك و اللعب و صداع، عيالاتهم كيوجدو الحلويات كالشباكية و الغريبة، البسطيلة، كعب الغزال، لمحنشة ... و كيتبادلو الزيارات و الحلويات بين العائلة و كيجلسو مجموعين وقت طويل كيبداو اعاودوا النكت و كيقشبو مع بعضهم و الأغلبية منهم كتعجبهم الكارطا كيبقاو يلعبو الروندا و بالليل كيديرو لباس تنكري و كيبداو ايديرو مقالب لبعضهم.

رأس السنة العيبرية (روش هاشانا) لما كيوصل شهر تيشري العبري كيبداو اليهود ديالنا كيندبو و كيحيرو حيت من أساسيات هاد روش هاشانا هي الندم على اللي فات و التقرب إلى الله و اللإبتعاد عن المعاصي و الخطايا و كيضلو النهار كامل عاطيينها غير البكاء و كتبدا مراسيم ديال هاد العيد مع غروب الشمس بحيث كيبقاو يقراو التوراة و كيدعيو الله باش بغفر ليهم من بعد كيتناولو وجبة العيد و اللي هي عبارة عن راس ديال جدي مع الخضرة أولا دجاج بالبصلة.

يوم الغفران (يوم كيبور) و اللي كيجي من بعد السنة العيبرية ب 8 أيام و هو اليوم اللي كيصومو فيه ليهود دياولنا كيف أما أمرهم التوراة و فيه كيتذكرو المعاصي اللي ارتكبوها في حق الله و فحق الناس و كيطلبو من الله المغفرة و الرحمة و كيفطرو بالدجاج مقلي في زيت الزعفران مع اللوز.

تسمية المولود و الختان عند اليهود في اليوم الثامن من بعد ما كيتزاد مولود جديد ذكر كيختنوه و كيديرو ليه حفلة و كيبداو اكترو من الدعاء و الصلاة و كيغنيو أناشيد خاصة بهاد المناسبة من بعد كيبداو بغطيو ريوسهم بالفولار و كيختارو اسم للمولود الجديد و من بين أهم الأسماء اللي كيسميوها اليهود لولادهم:
هارون، يوسف، شلومو، شمهون، سامي، موريس، موشي، دافيد، ايلي..... و غالبا المولود الجديد كيسمويه على بّاه اولا جدّو.

أهم الأعياد و المناسابات عند اليهود هما اللي قلنا و لكن هناك طقوس أخرى و كثيرة كطلب الغيث و أجواء الزواج و الجنازة و زيارات الأضرحة.... اللي ما كتختلفش بزاف على طقوس المسلمين كاين تشابه بزاف.




شكون اللي كيحمي اليهود المغارب؟؟
التاريخ المغربي الشفهي و المكتوب جا فيه أن الملك محمد الخامس كان كيحمي اليهود المغاربة و المصالح ديالهوم و كل اعتداء كان كيهددهم، خصوصا لما دارت حكومة فيشي بسن اللي كان كيقودها في داك الوقت دولف هتلير قانون جديد كينص على تجميع اليهود و إرسالهم إلى معسكرات الإبادة فألمانيا و بولونيا و فديك الفترة رفض الملك محمد الخامس تسليم رعاياه اليهود لألمانيا و قال. "أنا لست ملك المسلمين فقط، و إنما ملك لكل المغاربة". و ماوفقش على قوانين النازية ديال حكومة "فيشي" و كان حريص على حتى حاجة ما متمس اليهود ديالنا ، هادشي اللي خلى اليهود يعترفوا بالفضل ديال ملكنا محمد الخامس و ساهموا بشكل ايجابي و كبير في اقتصاد المغرب، و قالو: "إن جلالة الملك سيخالف النص القراني إذا ما صدق على إجراءات متناقضة نصا و روحا لمضمون القرءان، فإن المسيحيين و اليهود في نظرهم، الحق في العيش في أرض اسلامية و لهم أن يهومو بجميع المهن التي لا مساس لها بالدين على شرط أداء الضرائب و احترام التشريع الاسلامي". و استطع محمد الخامس أن يحفظ أسس الحياة الدينية و المدنية ليهودنا.
و فالواقع فإن التقاليد الإسلامية تميزات ديما بحماية اليهود، و ملوك المغرب ماتخلاوش على هاد التقاليد أبدا و كانوا ديما كيحميو اليهود ديالنا.


اليهود في مراكز القرار
كانوا نساء اليهود خياطات مجهدات، و كانو كيخيطو الكسوة و الألبسة لأبناء المسليمن و مشاو بعيد فهاد الدومين ديال الخياطة و بذلك قدرو انالو العطف و الحماية ديال الملوك العلويين و المخزن و هاد العطف بانت الثمار ديالو لما عيّن الملك الراحل الحسن الثاني يهودي مغربي تزاد فمدينة الصويرة مستشارا له في الشؤون الإقتصادية و اللي هو "أندري أزولاي" و من بعد تم تعيين يهودي اخر "سييرج برديغو" وزيرا للسياحة، و بذلك بدات كتمتد النفوذ السياسية لليهود المغاربة و اللي وصلات للقبة ديال البرلمان أعلى جهاز تشريعي فالبلاد لما صوتو المغاربة المسلمين على "سيمون ليفي" في منطقة بوكاران اللي كتواجد فمدينة أكادير و هو كان مرشخ من الحزب الإتحاد الدستوري و اللي لبس حتى هو جلابة بيضاء و طربوش الوطني و ادخل مجلس النواب من أبوابه الواسعة و ياسم الديموقراطية، و بقى النائب البرلماني "سيمون ليفي" كيحضر الجلسات النيابية وكيدافع على مصالح سكان ديال الدائرة الإنتخابية ديالو بقوة و جرأة و باللسان المغربي الى سمعتيه ما تقولش كاع هادا يهودي.

إسرائليون من أصل مغربي
ايلي يشاي: مغربي يهودي تزاد فمدينة فاس سنة 1962 شغل منصب وزير الصناعة الإسرائيلية و زعيم حزب شاس الديني المتطرف.
عمير بيرتز: من مواليد مدينة ابي جعد هاجر من المغرب مع والديه و هو فعمرو 4 سنين شغل منصب رئيس بلدية سديروت و تعيّن رئيس حزب العمل في 2005 و من بعد تعيّن وزير الدفاع اللإسرائيلي و هو اللي نوّد الحرب ديال لبنان في 2006 و تمنع من دخول المغرب من بعد ما مجموعة من المحامين المغاربة جمعو توقيعات على جرائم الحرب اللي ارتكبها في لبنان.
شلومو بن عامي: هو ولد مدينة أصيلة تقلد منصب وزير الخاريجية و سفير اسرائيل في اسبانيا حيت كان كيهدر اسبنيولية مزيان بحكم أنه تربّى فشمال المغرب.
ديفيد ليفي: ولد مدينة الرباط و بالضبط فالملاح لقديم هاجر لفلسطين و هو فعمرو 7 سنين شارك فالحرب ديال 1967 و 1973 و شد منصب وزير الخاريجية و هو من أبرز السياسيين الإسرائيليين و أيضا أحد أبرز قادة حزب الليكود.
موردخاي فعنونو: من مدينة صفرو و هو عالم الدرة محكوم عليه ب 20 عام دالحبس بسبب المواقف ديالو و أسرارو على المنشات النووية الإسرائيلية و باقي كيدوّز فيها.
يوسي بن عيون: من مواليد مدينة أصيلا و هو لاعب نادي ليفربول.


الخرجة:

باقي كاين بزاف ما يتقال على ليهود ديالنا حاولنا نختصرو و نقربوكم ليهم و نسلطو الضوء على الطقوس ديالهوم و باختصار شديد حبهم لبلاد و الغيرة ديالهوم على المغرب ما كتقلش عن حب مغاربة المسلمين و هما لعبو دور كبير في التنمية الإقتصادية دلبلاد و كيبقى الإختلاف بنتنا لكن الأهم هما ماشي اقل وطنية من المسلمين المغاربة.