أجي نعاود ليك : المراهقة الباسلة

أجي نعاود ليك : المراهقة الباسلة


المراهقة الباسلة

بقلم: مول الضل
ا لمراهقة هي مرحلة طبيعية وصعيبة كيمر منها الإنسان ،وكل واحد منا كيفاش كيدوزها،كاين لكتجيه نورمال كيدير عقلوا وكتوكّدْ "بحالي"وكاين كيتفلّس،وكاين لي معندوش علاش إحشمْ كيحماق الله إستر...وكيفما كيقولوا المتخصّين في دراسة تطورات جسم وعقلية الإنسان ،أن الإنسان فهاد المرحلة كيعرف نوع من التحولات على مستوى الجسم والعقلية،حتى طريقة تفكير كتكون عندها مصارات متعددة منها كيختار الإنسان الشخصية الخاصة به ويطورها على طريقته الخاصة وهي تسمى أيظا مرحلة الإنتقال أو قنطرة العبور من طفل لرجل وراكوم عارفين أن هذه التطورات شحال عندها من إنعكاسات سلبية على المراهق داكشي كنشوفوه كيقوم بأعمال محرجة كتجلى أف لبسالات ،أفعال غير أخلاقية وخطيرة في بعض الأحيان .


وهاد الأفعال ديال المراهقين تنشفوها فينما كنا ،سواء في المقهى أو أف الطوبيس ولا حتى أف الزنقة...المهم نبداوْ نهضروا على المراهقين أف المقهى ؛وأنت جالس كتشرب قهيوة يبانوا ليك واحد الرباعة ديال المراهقين لكنهضروا عليهوم ضحكة باسلة تقرقيب الناب أف لخوا الخاوي واحد جالس على كرسي حاط رجليه على كرسي واحد أخور،وأنا كنشوف هاد المناظر كنقول سبحان الله العضيم الأغلبية ديال المراهقين باسلين معمرهوم داروها مزيّة عارفين غير خاوية وعامرة داك الفيس فيهوم غير خطيّة ،هاهما جالسين أف القهوة مكيعروش إهضروا بشْويّة مرة إتكلموا الفرنسي مرة بالعربية شي كيشرب أتاي شي كيشتح أف الصينية ،واحد إكمي السيكّار لاخور كايدير شتوكية مازال إقوليك الله إعفوا من هاد لبليّة شي كيسمع لبلال لاخور طالق الزهوانية كيفكروا ويتمناوْ تكون عندهوم شي باكية إبدلوا حتى سمية ويزيدوا إتبلاوْ بشحال من بليّة...

دابا نهضروا على المراهقين أف الزنقة خارجين مجموعات أف لعشية شي لبسة ستيكْ تاكْ تحسينة الفرماجة كيدصروا على بنات الناس هادي بيضة وغليظة دايرة بحال الثلاجة هاد رقيقة بحال قلم الرصاص هادي لابسة بونطالون مضيق جاها زوين بصّح شوية معيق هادي فرفاشة كتنقّز بحال الفراشة...شوف داك الزين ..وسكوت واش حتى هاديك دريّة سنانها طوال دايرة بحال شي قنية شعرها مكمّش بحال الشطابة البلدية أخايْ لاطاي ،لاطاي عندها فريّة هادي لابسة جلابة متكون غير عروبية وتشوفها صباح بكري كتبان كي المشّة البورية شفتك أنت غير كتضحك عليا أنا داوي بنيتي وأنت كتشفى فيا...هاهي نايضة بناتهوم شي حد أجبد جنويّة المهم خلينا من هاد لحريرة متفهموا منها حتى لعبة.
بصراحة هذه هي تصرفات المراهقين التي تزداد تأزما لكن كيما كيقولوا كولشي جاي من التربية.