سولت الأيام دازت زربانة
نوقف رقاصها يعطيني جوابي
ما سمعني النهار صام وذنيه
نترجاه ايجاوب يرحم عذابي
جات الساعة ساخطة نهراتو
انت خدام ما بايع ما مرابي
داز الحد في الأيام مرتاح
السبت فيه قصارة صحابي
الإثنين فايق بكري مشمر
الثلاث ما يتلفت باقي شبابي
لاربعا حمره قالوها زمان
ايعمرو فيه سواق ورحابي
الجمعة مومنة بالتحقيق تمام
فيها يحلا طعامي وشرابي
السبت ايهودي ما عندو دين
شي طالع في جبال وعقابي
سيمانة تجر ختها وراها بصح
حسابو ايعرفو الشلح او المزابي
جانا يناير برعادو وشتاه
ايعمر سدود ويعمر خوابي
فبراير ناقص نهار اولا جوج
فيه رابو القصور و الخوابي
شهر ثلاثة قالو مارس جانا
فيه تزيان سرحتي و تحلابي
بالكذوب سلم علينا ابريل
عيات الدابة وعياو كعابي
ماي العمال فيه عاد فاقو
شي يتشلهب شي بصح نقابي
يونيو بيه تدخل الحرارة
ايبدلو الناس كاع ليزابي
سبعة يوليوز ما عليه حكام
مساوي فيها المسيحي و المغربي
غشت جاو فيه ليزيميكري
تلفو عليه شراجمي و بوابي
شي باغي ايكمل في البني دارو
شي جا ايبيع الخوابي
في شهر تسعود نعاود الحساب
نصبح هاز ديما قرابي
شهر عشرة نعدو ليه المحراث
فيه يبداو احرابي
نونبر قالو ايعلم الناس
فيه الكلام الحلو و النابي
عاد يكمل العام بدجنبر
فيه وايت نايت احبابي
لعمر اللي ايدوز منا غفالة
نتذكر قبري و ثرابي
حسن لكصايري
موضوع: الأيام 
الثلاثاء 20 يوليو - 20:30:03
