التسليم لرجال لبلاد
وأنا خديمكم يا لسياد
ناس شمرت بلبيض
نايضة فجنابنا
شواك واعواد
وشادة فيدها زرواطة
والزرواطة بعرق كتافي كبرت
تهزت حتى تهزت
وعلى ظهري نزلت
أح قداش توشمت
-*-*-*-*-
شقموني وفمطمورت الظلام تكركبت
وكلوني اش وكلوني
لحجر ما نقاوه من اللوبية ولعدس
وبزروقيت السيمة
وبروديت الضس
ظهري تعكف وتشكرف
ما بقيت ننعس
الكرسي داروه قرعة
الجفاف والضو بين لكتاف
وقبل ما نورد
حالي خرف
ونشف وخمجت
-*-*-*-*-
قالو لي ابصم
قلت ليهم النم
وخا تزيدوني هم على هم
حالف بحلوفي يابلادي
حتى نتكلم
ما نرضاك تكوني ضامة
لاعبين فيك الزنادق
الوقت نبار
وحنا فيك بيادق
احنا مشتين فالرقعة
وهما شادين الواد
واللي منا بغا يعلق
شدوه بالتلاتة والصنعة
وبقا مشنق
-*-*-*-*-
وحالف بحلوفي يل بلادي حتى نتكلم
مانرضاك تكوني كارطة بلدية
لاعبين بيك البيع والشرا
الشاري مول لوروس
يد هازة علينا شباظة
ويد فيها الباسطوس
وموخر الكوباص علينا صكوك
وحين تخمر لخبيزة
وتبان ليه لهميزة
يلعب بالرميزة
وحنا نبقاو شنوك
-*-*-*-*-
وحالف بحلوفي يا بلادي حتى نتكلم
ونقول بالصوت العالي لداك الجلاد
خير ما فخيلك ركبو
اللي فراسي راه فراسي
الى تقطع رجلي
نتعافر ونحبو
ويدي فيها فاسي
والى تقطع يدي
ما توصل احساسي
يطلع من فمي كلام
حروفو هي قرطاسي
هرس فمي هدا جهدك
من بعد ما ليك عليا حكام
حنت بقات غير انفاسي
هديك بيد ربي والــســلام
محمد مكار