تحميما كحلة

تحميما كحلة


بـونضــاضـر
bondader@blafran.com

ئيوا دابا مع القضية نايضا عند لعريبان- ومصائب عريبان عند المغاربة فوائد- قلت مع راسي الخدمة غادي توجد و المشاكل غادي تتحل، قلت غير يخدموني شي خدمة مريكلة، نتزوج، و بديت تنفكر فمراتي المستقبلية و منين تكون و كيفاش تكون- بقيت نفكر حتا توحشتها - و سرحت و مشيت فتخمامي، قلت أسيدي غادي نتزوج و مراتي غادي يجيها لوحم عليا و ماغاداش تحملني، لحقاش مامشيتش للحمام مني كنت فالتحضيري. و أنا نجمع الوقفة و خرجت للحمام في 4 ديال الصباح.



قلت نمشي لواحد الحمام بعيد و مانتلاقا حتا شي واحد من ولاد الدرب، لموهيم وصلت لباب الحمام، لقيت شي حديد واااعر و ماطر و شي خوت كبــــار من بنادم لابسين الكومبليات و دايرين نضاضر ديال الشمس فالليل. تضهشرت، و بغيت ندير دومي تور و قلت مع راسي والله حتا نكمل و ما نرجع حتا نتحمم. غير قربت للباب كثر، جبدو عليا هادوك الوحوش الكوابس، و قال ليا واحد منهم " أش جابك يا هاد لموسخ في هاد الليل ... " ، بقيت غير ساكت – مع أنا مغريبي بزاف - وعيطو لشاف ديالهم، قاليهم " هداو ... نزل السلاح ... خليو هاد لمودك يدخل لحمام و لا لجهنام ... دابا حتا هو يشعل فراسو لعافية " ضحكت و بديت داخل و هو يدفل و قال " تفووووو على مروكان " – بغيت نرجع ليه و لكن قلت معاه الحق و ما قال حتا عيب - .



بديت تا نحيد حوايجي، شفت فلفورما ديال، و أنا نكشكش ضحك، قلت مع راسي حتا ايلا بغيت نشعل فراسي لعافية ما تشدش فيا، دخلت للسخون، و أنا نلقا الدنيا خاويــــا، كاين غير واحد الراجل ضعيف و بيض بحال فيران التجارب و راسو شايب، قلت ليه السلام، مردش عليا، كان مكســـــل و غير شافني جمع الوقفا و شد لقنيـــتا، قلبت عليه و مشيت نعمر صطولتي، قلت ياكما بغاني نحك ليه و حشم، رجعت عندو، قلت ليه نحك ليك ؟ و هو يثورو قاليا " وااا فوتوني وااا ها لعار بعدو مني ... " . قلت ليه : نتا مالك الحاج غادي تندمنا حتا جينا لهاد الحمام ؟ راه غير خفت مراتي مني نتزوج يجيها لوحم عليا، مع دابا الدولة غادي تخدمنا و غادي يوجدو لينا لخدمة ... و كملت ليه الحكاية، و هو يتلاح تيتمرغ و يضحك، قاليا ما عرفتينيش؟ قلت ليه : لا سمح ليا لحمام هدا و الظلمة و خليت نظاظري في الدار. و هو يقول ليا " كيفاش غادي يوجدو ليكم الخدمة ؟" قلت ليه : واه الواليد مع خافونا حتا حنا نمشيو نحرقو ريوسنا ، ضحك و قال ليا " لا ما غادينش يوجدو لخدمة، غادي يفتاتحو عدد كبير من لحباسات، و كل مدينة فيها حبس ديالها، و لي تفدفد يدخل يزور، و لي حرق راسو هنانا كاع.



" قال هاد لكلام بواحد اللهجة شديدة، و صدمني كلام هاد الراجل، جاني بحالا شخصية دبلوماسية، قلت ليه : علا هاد القيبال نرجع لدارنا ماكاين لا حمام لا زواج و لا وحم، قاليا " غيــــر رجع، أه، و فوت عليك لكلافي و فراني شوية و لا غادي نحش لباباك ركابي ... "

خلعني، ما بقيت عارف لي نقول ليه، قلت ليه سمح ليا أ سيدي غير شكون نتا ؟ جوابني و قال " أنا هو ــــــــ بن فرناس، لي ما ننزل من لقبة حتا نشيبكم و ندخلكم كــــاع للحباس" .