انتومة بديتو بـــ سلام
و أنا سلامي ليكم
جايكم هاز علام
محبتكم يا حبابي
ساكناني دوام
و كون ورقتي ساعفتني
نجيكم فــــ بساط الريح غرام
تمنيت نجيكم
فــــ صفة حمام
رمز المحبة و السلام
تمنيت نجيكم
فـــ صفة وشام
مزين وجه هاذ الڭعدة
تمنيت نجيكم
عسل الشهدة
محلي شلا فام
اللي مرارها
للقياس تعدى
تمنيت نجيكم
على ظهر النخوة علام
مسرج الأحلام
هاز مكحلتي
ونتبورد فـــ مجبد الكلام
و إلا ما كانوا عندي ڭدام
نجيكم يا حبابي
بڭدام الڭلب
و نزور المقام
إيلا توب المحبة تبالى و قدام
بمغازل أمي " هاينة"
نحيك من سدى البسمة
حيك تڭريجتو تمام
و هنا ڭال البراح:
الموت فـــ وسط الحباب
نزاهة مبشورة
هنا ڭال البراح:
العڭبة فـــ وجه الحباب محدورة
أيه.. أيه ڭالها البراح
و أنا غير رقاص
تكتبني هاذ القلام
و انا نجيكم فـــ سطورة
تمنيت نجيكم كلمة..
حلمة..
نجمة..
ونضوي الظلام
حطيت ليدي على ڭلبي
و سرحت فـــ التخمام
نخمم فـــ حروف
دايرة للمعاني لجام
نفكر فـــ كفوف
من حر العشق
تشالي بــــ نغام
نفكر فـــ جوف
ساكناه سقام
و أنا غير نظام
المعنى موالف بيه
و فـــ مواجو عوام
وها كلامي ليكم
لبسوه سلهام
توفيق لبيض "اليوسفية"
موضوع: سلام الغادي 
الثلاثاء 20 يوليو - 19:55:20
