منين نبدا الحكاية
كيفاش ننقش لبداية
ها الثقافة صبحت بلا ريحة
ها الأدب ضاع لو سرو و المْليحة
علاش كثرو البواق
علاش خضار النفاق
هذا قْلب وجهو
و ذاك خْبى شمعتو
و أنا بين البارح و اليوم
شفت اللي جرى ف النوم
قلت اللي دازت على الراس
زينة واخا تطَير النعاس
و النعاس هجرني م طار
و الشمتة ف قلبي شاعلة نار
علاش النفاق ، علاش المنكر
ها نا بين قبة و قبة
ها أنا يا البيضا
يا اللي م خلاوك بيضا
ها نا نطوف تحت الشتا
زناقيك تغزل الوفا
و طرقانك تتوحم على الهنا
ها نا نحاجي على الفقرا
هي حومة ما فيها نصارة
و الشتا تغسل وسخ الخسارة
من درب لدرب من زنقة لزنقة
الهنا ما بقى هنا
و الشارع الطويل يهضر ف شونو
حشمان من سرو ما عرف كيف يگَولو
غير هضر و خوي الخنيشة
راني تكرهت ف هاذ العيشة
غير هضر بلا م تحشم، بلا م تكل
غير هضر و لْْفنا الحكَرة و الذل
الزناقي بلا مكتبات
و السينمات رجعو محلبات
آه الايام و شحال من آه تكَدني
آه الايام ، هاذ الحمل هدني
ها أمنية مشي أمنية
ها أمنية فيها سيناريو المقبرة
و حياتهم مشات خسارة
ذاكرتي تكبلات ، تغيرات
لله يا البيضا م بغيت جوا منجل
بغيت غير الهنا و راحة البال
لله يا البيضا روحك تتسل
و ليت أنا و نت من المحال
و الشتا،أنت يا الشتا أشنو نعمل
غسلي القلوب من السم
وصُوني و ليداتك من الهم
الشتا يا الشتا
وجه البيضا كلو نْديبْ
ديما حارگَة ، تحضر و تغيبْ
و نا نكتب حكايتي
على وْرَاقْك يا البيضا
أنا نبكي على صدرك يا البيضا
ضميني، ضميني
راني بلا بيك القهرة تجليني
رقعي معاية جلدي و جلدهم
ركبي حماقي و حماقهم
نْتِ يا البيضا
مالك شردتي الاولاد
مالك ودرتي الاوتاد
ها نا نغسل عارهم في إكسيلوسيور
و نرمي تابعتهم في سيدي بليوط
آه يا البيضا عليك ضحكو
منين كَالو راك بيضا
راهم غادين يتفضحو
آه يا البيضا علاش بعتي لونك
علاش نسيتي شجونك
شوفي بنيياتك فْ لاكورنيش
شوفي وليداتك ف الزناقي بلا عيش
شري لكل واحد قرطاس شمع
يشعل شمعة،يمسح دمعة
يهنا البال ، يصفا الحال
و نصبح أنا و أنت مشي من المحال.
حبيبة زوكَي الجديدة
موضوع: آه يا البيضا 
الثلاثاء 20 يوليو - 19:56:44
