عيق و فيق : مغرب بلا وجوه النحس !!!
ستيلو: رمسيس بولعيون
بين و بينكم هاد الأيام التالية حاس براسي ماشي تا لهيه، واقيلا شي مرض جديد غا يبان و أن أول واحد غا يتقاس بيه، وبزاف و الله تا بزاف الدراري و الدريات هادشي اللي طاري ليا، واش أنا كلما جيت نحط راسي بالليل على الوسادة ننعس تا كنبدا نتخايل المغرب ما فيهش عباس الفاسي و لا همة و لا ياسمنة بادو و لا غلاب و لا بن شماس و لا بن كيران و لا حتى شي أمين عام ديال شي حزب سياسي و لا حتى الأحزاب كلها و لا مجلس إستشاري لحقوق الإنسان و لا برلمانيين و لا برلمان ولا و لا و لا ....
و كنبدا نسرح و نخمم كي غا تكون لبلاد، بعض المرات كا نقول غا تولي بحال ميركان، كلشي مقاد و مصاوب، الترانات المطروات أرا برع، الشوارع نقية، العمارات غير بزاج، و الإشهارات فالشارع كبار و داكشي لا لبرتي طوطال،و بنادم خدام بلا قوالب ، الخلصة زوينة، الحريات الشخصية و الجماعية،القانون سيد الجميع، المهم كانشوف الناظور هي لاس فيكاس، و الرباط هي واشنطن، و كازا هي نيو يورك و المغرب ميركان أمعلم، و داكشي ديال هاوريو مان و بيوتفل و زاز لوز، غير و كان نقصنا تمثال الحرية، ولكن تا هو لقيت ليه الحل، غا نديروا تا حنا واحد و نسميوه تمثال النية و نحطوه فالدخلة ديال سيدي زرهون....
و بعض المرات كا نقول لا ما يمكنش بلا هاد الناس غا نوليو اللور اللور، و كا نقول مع راستي غا يبانو شي قماقم كثر منهم و غا يرونوا لبلاد، غا يردوها بحال دوك الدول الطائفية، و ينوضو الصحراوة من جيه و الشماليين من جيه و الريافة من جيه و الغرب من جيه، و كلها غا يبغي يحكم و يسيطر و فالتالي نكملها بالمطايفة ما بنتنا، حتى تجي شي دولة و تقول لنا هداو هداو، حنا اللي غا نكادوا هادشي، ونوليو من الأول و جديد مستعمرين، و تبدأ الروينة و شي 50 عام أخرين ديال النضال المسلح و داكشي ديال الإستقلال و جيش التحرير، و يبان عاود شي عبد الكريم خطابي جديد غير هو في 2011 غا يكون سميتو سيمو، و سير عاود فين و فين نخرجوهم، و سير و سير فين عاود نبنيو دولة و سير و سير فين كلشي يولي هو هداك...
و بعض الخطرات كانقول أو زعما شكون هما كاع هادو، راه غير عباس لمقفقف و الهمة التالف و ياسمنة الضاحكة و بن شماس لبحلاط و بن كيران لخوانجي.....
كي كانو كي مكانوش تا حاجة ما تبدل أصلا الشغل و اللعب ماشي فيدهم، هما غير معمرين بيهم الشقف و مكملين بيهم لحساب، بحالنا بحالهم، غير باغيين يركبوا علينا العشرة و يبانو مهمين، أما المغرب و لبلاد غادية بهم و لا بلا بهم، بغاو و لا كارهو.
و فشي سرحات تا نقول لبلاد بلا بهم غا تكون باسلة، أو، علامن غا يبداو إكتبوا الصحافة، و فيمن غا يبقاو إشدوا و علامن غا نبقاو نطلعوا التريكيل و التكركير، و فين غا نخصروا فلوس الشعب، و شكون غا يتكرفس على و لاد الشعب إلى مكانوش هما....
السناريوهات اللي طاحت ليا في البال ما عمر غا نساليها إلى كملت لمعاودة راه عمرني ما نسالي ، و هو فالحقيقة المهم من هادشي كامل اللي قولتو لكم، هو أنه أنا ماشي سوقي كانو و لا ما كانوش هاد وجوه النحس، أنا باغي نبقا ننعس فالوقت. و إلى كانت شي إنفلونزا وجوه النحس عطونا دوها الله يرحم لكم بها الوليدين.و عيق و فيق بحال دايمن
موضوع: عيق و فيق : مغرب بلا وجوه النحس !!! 
الجمعة 11 فبراير - 16:46:42
