ضد الريح

جريت حتى عييت، وغبت ومشيت ضد الريح
وهبت عليا سبع رياح
ألقيت الدسارة والداسر بالشكارة بجبهتو صحيح
لخطية عندو كيف الرباح
وأنا مسكين الركابي خاويين، نوض ونطيح
في ليلي كيف الصباح
كلامي متمتم ولساني معلثم وخا صحيح فصيح
وعلى وداني كثرة لصياح
على حق دويت ﯕالو خزيت ردوني قبيح
وليت طالب نرتاح
في بلاد الريح والشيح الدوني وللي مليح
والفقيه وللي مداح
بين كدى وشعاب ونهش الدياب تعوﯔ وتصيح
ما بقى حق في مراح
هارب من الباطل وأنا حاصل صادق صريح
بطاي طاي والبراح
مول الحق مجروح بدمعو ينوح سقيم طريح
آه على كلبي ياصاح
اللي ما هدر وبسيف لغدر مدج ومذبوح ذبيح
شارب من لمرار قداح
حالتي مڭلوبة امتى النوبة والوجبة ليا تيح
وعلى لساني تطلق لسراح
ويحمر خدي وما نمد يدي لبخيل الشحيح
حسبتو صالح الصلاح
الدسة والعدة تحت اللبدة وفي اليد تسبيح
تلقاه في غدة وارواح
لكلام والهذرة وسموالغدرة من لسانو يسيح
ويطعن في لڭفى جراح
يبكي لبكايا نحسبو معايا وهو مع الريح
ما فيه خير حسن يتلاح

عبدالرحمان اجبيلو