حسرة لسقام
نسخت من سقامي حسره
مدهي،ف ضيق الخاطر مكتف
واحل ف وحال محاين حكره
وجراح الغدر فالظهر تنزف.
ملهي فحلام و وهام.
تيهان القهره
ورياح الهم ظلام
بوراق خريفي تعصف.
محال يا خال نتهنى
مازال ميعادي يتخلف
مازال،مازال نتمنى
مازال نشد الصف
مازال ف المحال نتسنى
مازال تحت لتحت مصنف.
مازال طويل ليل المحنه
مازال نطلع ف سلوم السلف
مازال ننزل ف دروج الفتنه
مازال نكبر ونزيد نولف.
نولف وما تفوت الشده
الصبر فينا زادو خرف
الكلمه مالقات لصداها نفذه
وشباح البارح،
فظلام اليوم تخوف.
لسيرة غده؟
شحال يكفي من عده
وللي بعدو
شحال يقدو
من وعده.
شحال يكفي
من صبر زاد
من رجله وعناد
من قلام وبحور مداد
باش تبعت الروح فالكسده.
باش لفجر يطل
ومحالي يتحدى
باش مرادي يوصل
ومواج الفتنه ف بحورنا تهدى
باش لقصيده تكمل
والرحله تبدا.....
لقلم الفضاح
ما يروم مداد الطاعه
والحرف المداح
يتجيف بحبال الذل
وتخرج الحروف
من محراب الخوف
للحق طوع وطاعه
من وجوه ف الجاه طماعه.
ودُور،دُور الساعه
كيف العاده دُور
يتعرى فينا الحق جماعه
يتفضح الواضح والمستور
وتطلع شحال من رجله فينا إشاعه.
محمد اجنياح
موضوع: " حسرة لسقام" ( زجل) 
الإثنين 21 فبراير - 12:06:08