زجل
خــــــيــــــر و ســـــلام
هشام حـــراك
من حيث أنا مجدوب بوهالي
لقيت هموم الكرة الأرضية تساوي هبالي
وصداع الأسئلة الكبيرة يتموج ف راسي
والحيرة تشرب من احساسي ما بقى ف احساسي
كيف لي حتى نكون هاني ونغزل من لاباس لباسي
قلت نحلم بجغمة من ريق كاسي
غمضت عيني
شفت ف منامي
ـ خير وسلام ـ
اعراسي ويا ما اعراسي
تسحر العشاق وتفكر القلب الناسي
وجوه ملايكية
تطرز الشجر بالياقوت والمايس
شفت سمايا زرقة صافية
الطيور ع الانواع يسبحوا بعيد من وسواسي
على افنان قلبي حطو
غناوا... فرحوا... ولعبوا
شوية ... شوية
من ودني قربوا
غناوا ..فرحوا. ... ولعبوا
شوية ... شوية
همسوا ف سري
من اوتار الشمس و الريح نسجوا بساط سحري
طاروا بي ... جالوا بي
شفت شلة ناس
ها دراكولا يخطط بالدم حروبو
ها هولاكو يصبغ بالعيوب عيوبو
ها مسيلمة بلا جوق يلحن كذوبو
زعفت على الكرة الأرضية وناسها
قلت لطيوري طيروا بي
ف الربع الخالي من هبالي
رموني نوالي حال حالي
وهربوا علي
صرخت عليهم وعلي
ما سمعت ما سمعوا لي
قلت ف خاطري ولخاطري
ما فيها باس
نعاود نحلم ونرد جوابي لسؤالو
غمضت عيني ما شفت والو
حليتها من جديد ع االعالم و علي
لقيت موكة وحدها
واقفة قدامي
تخـنـزر في