حتيت لوسادة -زجل لسعيد الشفاج

جيبي لي وريدة نعطيك شلا نوار
جيبي لي الحنة نهديك ألف عطار
جيبي لي ضحكة من جبين ناصع
وسالف قاطع لبحور
نجيب ليك بابا عيشور
هاز معاه مرفودة مكيودة
جيبي لي الرضا
نرضى عليك دنيا ودين
ماكين ماحلا من شوفت العين للعين
لما تكون المحبة ثابتة والخاطر زين
جيبي لي كبة النحل نعطيك منو عسل
يداوي الخصام
جيبي لي كلمة صغيرة
نهديك من الهوى عرام
غير جيبي .
نجيب ليك معاي من السوق
اللويز والمرمة والبرقوق
غير هزي لي كديت عليه
الدنيا كتجري بحال الهبيل
والليل طويل
والنهار ما يستر
وكول الله يستر.
جيبي لي العشور
ماشي فلوس
بغيت النور لي طالع من وجه مبشور
جيبي لي حتيت الوسادة
غير تكون فيه ليفادة
جيبي لي الحشمة لما تخبا في الرموش
جيبي لي الفجر
لما يطلع من عيون ناعسة
نجيب ليك دعاوي الخير
مولانا يسمع ويدير
تاويل المحبة
المحبة ماتباع ما تشرا
والكية ما تبرا
جيبي لي الهدية مجرورة في حصان
نجيب ليك قلبي مورد فتان
جيبي السينية والكاس
نهديك خنشة عامرة احساس
أنا الراجل وانت المرا
أناالتانبر وأنت البرا
أنا المعاني وأنت الهضرا
أنا التراب وأنت البدرة
ولي ثقال يهزو الخاطر
بحال النادر لما يسترو التراب
خلينا قراب
بحال الضل ما يخون مولاه
مولانا زرع المحبة اجيو نسقيوها
مولانا حط الرحمة أجيو نحضيوها
فهمت