خويا الزجال اخت الزجالة

عدد المساهمات : 4 تاريخ التسجيل : 15/04/2011

أنا وحدة منكم يا زجال ويا زجالة
طينتي هي طينتكم
من نفس السلالة
انشم الحرف ونخرج
السدا من لبطانة
نرد الطعمة حيك ولا لعبانة
انغربل الدقيق مزيان
بالغربال و بوصيار
وانخرج السميد من وسط النخالة
نعوم مع الحوت ف البحر والواد
و ف الطبيعة عايشة جوالة
على نفسي ودراعي عوالة
ف حال الدنيا واحوال الناس
انفكر وانطرح المسألة
الحرف ف دواخلي إيجاهد
جهد السفينة الغرقانة
امحمل بثقل كبير
ما امخلي عندي كانة
من غير حرفي انعانقوا وانا فرحانة
نبغي نوصل الفكرة للعقول العطشانة
انقدمها بقلب فرحان ماني ندمانة
صاحبي نختارو
وما نرافق من والى
خوتي الزجالة
راكم بحالي ف نفس الحالة
ما يهمنا مال
ولا كل مرة انبدلوا النعالة
يكفينا لقليل
والنعسوا ف النوالة
نتفرشوا لحصير
ونتلذوا طعم لكبالة.

» قصيدة زجلية (عن..ايت اعتاب)الزجال عبد الرحيم بونس