بلا زواق : التكوين المهني جدوره الأطر الهشة و فاكهته البطالة

بلا زواق : التكوين المهني جدوره الأطر الهشة و فاكهته البطالة



__بـسـتـيـلـو/ بـونضــاضـر__



حصل على الباك في سن 18، و شاف أن الجامعة أقرب طريق للعطالة، بدليل خوتو لي غير مريحين، قال ناخد ديبلوم، نتعلم صنعة، و بهدا نضمن الانتماء للطبقة العمالية المطحونة – أيضا باش ما نخرقوش القانون، ولد الباشا يولي بيه، و ولد شعيبة تدار ليه – هدا هو السيناريو لي تيعيشو الشباب المغربي و لي بمجرد ما تيحصل على كرطونة البكالوريا تيتفتح فوجهو أبواب جهنم.



التكوين المهني ofppt هو جهاز تعليمي مربوط بقطاع الشغل، و ما بينو و بين الشغل غير الخير و الاحسان، و الأطر لي تاتشتاغل على تكوين المتدربين، هم في الغالب أشخاص متقاعدين من شركات مختلفة، أولا ناس حصلو على دبلوم الحرفة لي تيقريو و لي أيضا تلقنو الدروس على يد أطر غير مكونة. بحيث أن هاد الناس ما تيجمعهم مع المعلم أو الاستاد هو السلطة و البلوزة البيضة، أما من الناحية المعرفية " البولا الحمرا شاعلة " ، حتا كاين لي ما تيفهمش في أبسط قواعد اللغة الفرنسية، أما الناحية البيداغوجية و طريقة التعامل و التلقين غير نسكتو عليها لأنها منعدمة بالاساس.





ئيوا التكوين تيدوز في ظروف مزرية و على يد أطر هشة لدرجة خطيرة، بالاضافة الى نقس حاد في المواد الاساسية للقيام بالدروس التطبيقية، كل هدا و بغينا المتدرب يخرج بمستوى مزيان في اخر المطاف ؟ النفاق هدا. المهم، الامتحان يكون في المستوى، و المراقبين مــــاضين، و البق ما يزهق – المراقبين هم نفس الأطر لي ما قراو للتلامد واااالو ولكن جاو يحضيوهم مزيـــــان - ، كيفاش غادي ينجحو هاد المتدربين ؟ الرشوة و المحسوبية و باك صاحبي، تماما كيفما تقبلو نهار الاول و كيفما خدا البعض منهم الحق في الاقامة الداخلية.


نجح و خدا دبلوم، خدم ؟ لا لا لا ... ديزولي الخدمة وااالو، و بهدا تيكون الشاب ضيع عامين من حياتو باش يولي واااالو. ءيوا ءيلا راجت صور لناس لابسين بلوزة ديال ofppt و تيشتاغلو فغسيل السيارات، بيع الشفنج أولا حتا البني، راه بصح و ماشي خدع فوطوشوب، و على الأقل هاد الناس خدمو، لأن التكوين المهني في المغرب هو بوابة البطالة الواسعة.