بلا زواق : الكائنات المتحششة

بلا زواق : الكائنات المتحششة

الكائنات المتحششة

بلافران/ بونضاضر

موسيقى بوب مارلي، تغوفيلة راس و وجه، و " تي شورت " فضفــــاض هالكاه الشمش. هادي في الغالب هي الستونات ديال الكائنات المتحششة. مجموعات فراس الدرب أو في المقاهي الشعبية و حتا قدام الكوليج و الليسي. كاعي يتحشش، ناشط يتحشش، ما كاعي ما ناشط المهم خــــاصو يتحشش. و لي تيميز هاد الكائنات على باقي المخلوقات لي تتعاطى أصناف أخرى من المخدرات هو أنها تتكون أليـــــــفة، بحيت أن لي ضرب " جوان " تيشد لرض، قال واحد الشاب وهو تيتكيف : " ختاريت الحشيش لحقاش لي تيشرب يقدر يضارب، يقدر يجبد الصداع، ويدير شي حاجة تدخلو الحبس، بالنسبة للحشيش لا، غير الناس الله يهديم غالطين فينا أما لي تيتحشش تيكون مسالم و درويـــــش ... "



جمهور الحشيش في الغالب هو من الشباب، و بالخصوص الشباب العاطل، الشاب لي تيسمح فالحمام غير باش يوفر فلوسو و يتقداهم طريفة ديال الحشيش، لحقاش ما بقا عندو ما يدير بالنقاوة، و مني يتكيف تيبدا يتخيل راسو خدام، و نزل من طوموبيل ديالو لابس كومبلي قاتل، هاز كارطابل في ءيدو و قفل الطوموبيل أديسطون، طالع لبيروه و ملسق تبسيمة عريضة موجدها للسيكريتيرا... وغير تطير التبويقة يلقا راسو معنق البوطو ديال الضو و تيعوم فالعرق.

و الغريب فالأمر أن مدمنين الحشيش مابقاوش غير الشباب الفاشل كيف تيقولو - الشباب لي هلكوه و فشلوه و سماوه فاشل-، ولاو حتا شي شخصيات مرموقة من هواة الحشيش، و لي هوما فنانا و كتاب و صحفيين و حتا شي ناس تيبانو في التلفازة و ما بايناش عليهم. ءيوا ايلا الشباب قلنا الدريعة ديالو هي أنه تيعاني التهميش و تيحس الحكرة هي علاش ختار هاد الدوا، راه هاد الناس حتاهوما مساكن واخا خدامين و ملعقين ولكن مكرفسيــــن، لحقاش منهم لي هالكاه مراتو، و فيهم لي خارجا فيه نسيبتو، و كاين لي تيتبوق باش يمشي " للوندرلاند " غير مايتلاقاش مع لي تيتسالوه لكريدي.

غي هو الحشيش عندو ماليه، و ماشي غير أجي وتحشش، حتا أن واحد الولد مسكين قرا حتا طاب ودابا راه شاد مع خوتو الحيوط و الجناب، تلاقا صحابو تيتكيفو حشيش قال أرا ندوق و نسي شويا، هي هاديك تكيــــاف. رجع للدار لقاهم تيتعشاو، قاليه الأب ديالو " غسل يدك و تعالا تعشا " شاف فيه صاحبنا و حط ءيدو على صدرو و قال بلغة حنيـــنة : " غير تكيف الواليد .. غير تكيف ".