ديريكْت : أسوء شخصيات سنة 2010 بالمغرب

ديريكْت : أسوء شخصيات سنة 2010 بالمغرب



بلافران:

من زمان و جميع الجرائد و المجلات كتخصص الصفحات ديالها في أخر كل سنة لأحسن شخصية في السنة و التي بصمت بالأداء ديالها في أي ميدان المهم تكون حيحات و خلات البيبل يهتم بيها و بالعمل ديالها و مكيهمش المجال واش سياسي ولا اجتماعي ولا رياضي .

في بلافران.كوم قررنا نعاكسو التوجه ديال الجميع و نخصصو ملف لأسوء 5 شخصيات في المغرب و كالعادة بالا حيا بلا حشمة غادي نفرشو المستور و نبينو المدسوس و نعريو الحقائق.



الحاج خالد الناصري البراح

براح الحكومة الفاسية الحاج الرفيق الناصري هو اسوء بنادم تم الإختيار ديالو فالموقع باعتبار الخرجات المصطية ديالو بمناسبة ولا بلاش،جوج ضاربو عيطو للبارح،هجالة مقسرة شدوها البوليس عيطو للحاج،الرفيق الناصري غير المواقف ديالو 180 درجة مباشرة من بعد ماشد الكرسي ديال راجل سونيا فوزارة الإتصال ولا كيبرح بلا فرانات .

الحاج الشيوعي ديما دافع الجبهة و كيطبل للحكومة و هدا أمر عادي جدا بحكم أنه وزير ناطق بسمية الحكومة و خاصو ديما يقول أنها خدامة 5/5،ولكن الفضايح كتجي متابعة و الكل يتذكر فاش الناصري جا لشارع محمد الخامس فالرباط فنص الليل باش يفك وليدو لي كان سكران من يدين البوليس لي عتاقلوه من بعد ما تعدى على واحد السيد قدام بار لمان.

زبلات ديال الناصري لم تتوقف خصوصا منين كينغزوه باش يقول شي حوايج هو براسو ممقتنعش بهم،الحاصول ما بقى قد مافات و سيذهب صحاف الحكومة المغربية الى مزبلة التاريخ بلا رجعة،ومبروك المرتبة الأولى .

ياسمينة بادو الضاحكة

بنت ختو ديال وزيرنا الأول الله يعفو علينا منو و منهم أجمعين من نهار شدات الصحة من يدين بيد الله و هي اللور،زادت غرقات ليها الشقف ولاو المستشفيات بحال الكوريات و المرضى هم الحيوانات،ولاو السبيطارات مرادف للموت وكترات الحكرة ،الحاصول خرباتها و كلسات عليها و مازال عندها الخاطر ديال التفرنيس قدام الكاميرا،أودي واش محامية ولات وزيرة ديال الصحة،اذا كنت في المغرب فلاتستغرب،الحاصول بغينا ليها يهزها الما و يضربها الضو ديال راجلها علي الفويسي و يتهنا منها 30 مليون مغربي لي كيدعيو عليها صباح مساء.ومبروك الدوزيام.

شيد نيني الغراق

غراق العهد الجديد مدير عام و رئيس تحرير و سكرتير تحرير و صحفي و مدير حسابات و الأمر بالصرف و كلشي ديالو في شرويطة المساء الجريدة الوحيدة فالمغرب لي كتقرا من اللور و لي تموقع بطريقة خطيرة فالساحة الإعلامية عن طريق التطبيل للجهات التي تتحكم في الرقبة ديالو و لي ما عارفينها شكون هيا،المهم أنه ولا كيعري في عباد الله لي بغات الدولة تشوههم فالعمود ديالو.

نيني غراق العهد الجديد فتح جبهات مع كاع عباد الله و صحابو كذلك بدون استثناء لدرجة أنه ما بقى حد كيقولها فيه زينة من بعد القلبة الخايبة ديال الفيستة من الصحافة المستقلة للصحافة المستغلة.

الفاسي الفهري الخارج علينا

أسوء وزير خارجية عرفو تاريخ البشرية فالعالم،وناري مسالي من نهار شد بلاصة بنعيسى و هو ضاربها بنعيسة حتى ما بقى والو نغنيو على الصحراء روحتي خسارة ،السيد جبد الصداع مع السبليون و مع الجزائر و مع ايران و مع السينغال بقاتليها استراليا و امريكان و ينوض حرب ديبلوماسية عالمية،الحاصول خربها ومازال كالس فوقها.

و ما يمكنش نهدرو على الفاسي الفهري وننساو ولدو ابراهيم و الدعم لي كيوفرو ليه فأماديوس و فالقصاير ديالو من فلوس الشعب باش يطلعليه الكراد أودي لي عندو باه فالخارجية ما يبقاش بلا دعم.

فؤاد عالي الهم

هاد السيد الله يعميه علينا ولا كيتحكم فكلشي،خربق السياسة و خربق السياحة و خربق الرياضة و خربق حتى عباد الله بيناتهم،طالق شي تريسيانات معلمين فلملاقية ديال السلوكة و احد الياس العماري خربق الدنيا من طنجة حتى العيون وواحد بنشماس ولا بحال الكلون فالبار ديال لمان و شي حسرافة مزروعين فالمدون باركين و يلحسو ليه الكابة و يكدبو على عباد الله ،الحاصول هاد البوليسي ولا كيخلغ كلشي من الوزير الأول حتى لمول الديطاي لي فراس الدرب.الله ينجينا من البصري الجديد وما جاوره.

خاتمة و لكن ماشي شي خاتمة

هاد الشخصيات لي ختارينا فبلافران ما كتعنيش انها الوحيدة لي سيئة في المغرب و ان كلشي زين، بل هادو غير عينات ختاريناهم و دوك الديناصورات بحال عبيبيس و ألحكومة ديالو قبل التعديل و من بعد التعديل راهم مكلاصيين تاريخيا بلا منجبدوهوم و نخسرو الخاطر للقراء لي عزازين علينا،ولي بانتليه فشي واحد باب التعليقات مفتوح و لكم كامل الصلاحية.