فهم تسطا : مروان الفاسي الفهري ... العرج ماواكلاش

فهم تسطا : مروان الفاسي الفهري ... العرج ماواكلاش


مروان الفاسي الفهري ... العرج ماواكلاش

مـروان العـرج

شي دراري ففرانسا دارو واحد المبادرة زوينة و زوينة بزاف، ناضو أ سيدي (و أ لالا على سبيل المساواة) عمرو واحد لوريقة فيها المعلومات الشخصية ديالهم و صيفطوها لقصر الإيليزيه فين عايش موسيو ساركو مغماراتو الغرامية و كارلا بروني... و علاش صيفطوها ليه؟ياكما باش يطلبو منو خدمة؟ لا ... ياكما باش يقاد ليهم شي بلاصة فين يلعبو حدى برج إيفل؟ أوهو ... إذن بغاوه يقضي ليهم شي غراض؟ أبدا ... و علاش بغاوه؟كَالك بغاو ساركو يكون باهم، و ما فيها باس الا بغات حتا كارلا مرتو تكون مهم، زيادت الخير خيرين، وايلي... إيه و هاد الحركة لي دارو هاد الدراري ماشي باش يقلبو على أب ماعندهمش، و لا على و ديت كحوليت عينين ساركوزي، لا .. هاد الشبان كايتحتجو بهاد الطريقة على الرئيس ديال فرانسا لحقاش خدم ولدو فواحد البوسط كبير، و ملي كيما كالو هاد الدراري مادار ليهم ساركو والو فقضية الشغل من نهار حط رجليه فقصر الإيليزيه، كَالو علاش لا مانكونوش ولادو تاحنا ويضبر لينا فشي بوسط مخير، ... وا شوفو الوعي فين وصل.هاكدا خدمو الفرانساويين باش يحتجو علي قرار ساركوزي، بطريقة حضارية جدا، عندها بزاف ديال الدلالات، و زيد عليها أن هاد الشبان تايكولو ليه بطريقة ديبلوماسية جمع راسك أسي راحنا كلنا ولاد تسع شهور، و ماشي غير حيت نتا رئيس ولادك يشدو البلايص الواعرة فالبلاد...دابا نقلبو الآية و نفرضو بلي حنا ولاد المغرب زعما، مادام عارفين بلي البطالة هي لي تاتسننا، و ديك الكارتونة ديال الباك مانافعة لوالو، و حتا الا خدمنا عمر طاسيلتنا مانحلمو بشي بوسط واعر، و بغينا نسيفطو بريا بحال ديال لفرانساويين لمن نسيفطوها، للعنصر و لا أحرصان و لا الراضي و لا الشكر ولا ... ولا ...، أه بلاتي علاش مانصيفطوهاش لعائلة الفاسي كاملة مادام هي العائلة الكبرى لي شادة غير المناصب المخيرة فالمملكة لولادها و بصاليرات لي كايكولو عليهم...ساركو غير نوا يخدم ولدو ناضو ليه، و حنا ماقادين نديرو والو قدام هاد الكارتة ديال آل الفاسي لي ردو المغرب مجرد فيرمة ديالهم كايديرو فيها لي بغاو بلا مايكوليهم تا شي حد ديك القضية ديال "من أين لكم هذا؟"، حادكَين غير فالغوات قدام البرلمان، و لا نكولو غادي نديرو وقفة فالرباط باش نهبطو زعما "آل الفاسي و حاشيتهم" من سدة الحكم، و لغيوها فآخر لحظة بلا مانكَولو علاش، و ملي تحفا لينا كاينوضو شي ناس باغيين يفطرو رمضان و كايناضلو باش يطبقو هاد الحق بحالا إفطار رمضان هو لي بقا لينا فوسط هاد الماصب لي دايرة بينا... عمي عبيبيس دير ليا بلاصا مع ولادك فالحالة المدنية و من ليوم أنا سميتي مروان الفاسي الفهري بلاصت مروان العرج لحقاش هاد العرج ماواكلاش أما الفاسي الفهري تقدر ضبر ليا فشي معهد بحال لي عند براهيم ولد الطيب ... و نهار لي تخرجو من الفايسبوك و ديرو شي حاجة معقولة هانا معاكم، لحقاش الهضرة لخاوية غير غاتسطيني و مغانفهم فيها والو، و را كالها واحد السيد ديفو ماشي منهم ديفو جاي منا، ماحدنا كالسين و عايشين فهاد النفاق بينا و بين راسنا كانكولو هضرة و كانديرو وحدة أخرى ... نتلاقاو سيمانا جايا