فهم تسطا : الملك، التعليم فاشل ... الحكومة، التعليم بخير

فهم تسطا : الملك، التعليم فاشل ... الحكومة، التعليم بخير

الملك، التعليم فاشل ... الحكومة، التعليم بخير



مـروان لعرج

ها الموسم الدراسي الجديد بدا و المخطط الإستعجالي داز عليه عام و هو خارج لأرض الواقع و باقي ماشفنا والو، المدارس هوما هوما، تعليم كيما خلاه الملك الراحل الله يرحمو مازال، من نهار لي جات سياسة تخريب بغيت نكَول التعريب لي جابها حزب عمي عبيبيس، و التعليم لور لور، أجي بلاتي را كل عام تايجيبو لينا مقرر جديد واخا ماشي جديد؟. كيفاش نكونو زعما ضالمين هاد الناس لي حاكمين و شادين أقوى و أهم قطاع فمملكة محمد السادس... الله ينعل لي مايحشم.

ولايني كيفاش زعما مقرر جديد و ماشي جديد؟ راه بحال القضية ديال ألمزوق من برا آش خبارك من لداخل؟ را خشيشن (وزير التعليم) زاد فالكتوبا جداد غير لوان، و دار خليلوطة للدروس، و زاد فالتمان و قسم جيوب و ضهور عباد اله، و علاش هادشي كامل؟ الله أعلم.

سياسة التجهيل و التكلاخ و الفلوس و زيد و زيد لي خدامة فالقطاع لي كال عليه ملك المغرب فخطاب العرش الأخير "النظام التعليمي الذي طالما واجه عراقيل ديماغوجية، حالت دون تفعيل الإصلاحات البناءة سيظل يستنزف طاقات الدولة، و مواهب الفئات الشعبية في أنماط عقيمة من التعليم، تنذر بجعل رصيدنا البشري عائقا للتنمية، بدل أن يكون قاطرة لها"، انتهى هنا كلام الملك، و ملي الملك بييدو يعتارف بفشل النظام التعليمي بالمغرب ما بقا لخشيشن و عمي عبيبيس و حكومتهم مايكَولو، و هنا بانت حكومة "آل فاس" على حقيقتهم حكومة فاشلة في كل المجالات، كيفاش غادا تكون ناجحة و الملك شخصيا ماراضيش على حصيلتها (ولا حصلتها) في حل ثاني مشكلة بالمملكة بعد ملشكلة الوحدة الترابية.

آسيادنا را كاين لي مالاقي ماياكل و لا يلبس و معول على التعليم ديال وليداتو، واخا مايطمعش فشي بوسط عالي لحقاش ولادكم مساكن شادينهم و ماعندهمش فين يخدمو من الغير المناصب الكبرى، ولاد الفشوش ماعندنا مانديرو، و باش غادي يجيب هاد الدرويش المصاريف كاملة ديال اللباس و الكتوبة و زيد و زيد، آش باغيينو يدير؟ يموت زعما؟ ... و تانكَولو علاش المغرب نايضة فيه الرشوة و السرقة و ديما لور لور؟ را باينا الديفو جاي من هنا من التعليم، و من دوك لي تايبانو فالتلفزة الله يسمح ليهم و تايكدبو على الشعب و تايكَولو بلي العام زين عاين باين بحالا حنا جايين من المريخ مساكنينش فالمغرب، و يمكن يكونو باغيينا ندخلو ولادنا للتعليم الخاص حيت ولات القضية بحال بحال، كلشي بالفلوس، و نيت يلقاوها سبة باش يبيعو دوك الخربات لي مسميينهم مدارس، إوا لي مافحالهمش فين يمشيو؟ و زعما بهادشي لي تايديرو هاد الناس لي فيدهم الشغل غاديين نزيدو لقدام؟ إوا يمكن، و حتى هادي غادي نكَول عليها الله أعلم، دابا راكلشي ولا فعلم الغيب و لي جات مرحبا بيها، لحقاش كي تفهم شي لعبة مع هاد الناس غاتسطا... نتلاقاو سيمانا جايا.