فهم تسطا : برافو تونس... عقبال المغرب!!

فهم تسطا : برافو تونس... عقبال المغرب!!


مروان العرج

علاش ديما الزعماء ماتايبغيوش يخليو كرسي الزعامة فالوقت المناسب، و يخليو الباب مفتوح لشي حاجة سميتها الديمقراطية، لي ماتايعرفوهاش من طبيعة الحال؟، سؤال معقد بزاف تايدخل فيه ماهو ثقافي و نفسي و سياسي و حتى الجانب التنظيمي، سبب طرح هاد السؤال هي الطريقة المهينة لي طار بيها السرئيس التونسي المخلوع (ماشي من الخوف) زين الدين العابيدين بن علي، بعدما عشش فكرسي الحكم مند أمد، و لي جراو عليه رجال تونس و حتى عيالاتها، و لي ناضو فثورة حمراء ضد الحكَرة، و الظلم، و القمع، و الإهانة ... و كملو من عندكم، الغريب أيضا أن عدد من المتتبعين "تفاجؤو" لهاد الثورة الشبابية الحمراء من قلب تونس الخضراء، إلا أنه شنو كانو تايتسناو من الديكتاتورية العمياء ديال الرئيس الجبان بنعلي تخرج من غير تورة شباب باغي يتفركَع من شدة القمع و الديكتاتورية لي عايشين تهت منها.


هاد القضية ديال الزعمات ماشي غير فتونس و لايني فالعرب كاملين فشكل، غالي كَلس فوق كرسي المسؤولية تايلسق و ماتايسخاش، فيروس عربي الصنع و السلام، و لي جا نتيجة افراز بنية اجتماعية خاضعة ليه، بينية مازال تاتقدس مبدئ القبلية و الدين و العشائر، و السلطة كادير لعبتها وست هاد الخيلوطة، محيدة أي حاجة سميتها الحوار و صراع الأجيال، و الديمقراطية المهدد الأساسي للسلطة العربية المطلقة، هادشي لي تانلمسوه حتى فالتنظيمات السياسية و الإجتماعية علي حد سواء، و لي كايعتبرو أي زعيم فهو مقدس، و حتا الأسر العربية ولات تاتشوف الأب مقدس، و كلامو صحيح و خا يكَوليك السما خضرا راها خضرا باك هاداك، و هنا يكمن الخطر، و تكمن القفوزية السلطوية العربية.

شباب تونس عاقو بهادشي و أيام الحكَرة لي عاشو، قراتهم شنو كاين، و صبرو تاعياو و تفركَعو علي زين الدين العابدين بن علي، و كَالو ليه لي فجهدك ديرو ماتليناش بغيناك نود تكَعد من فوق داك الكرسي، بغا يبرد معاهوم الطرح و جرا على الحاشية ديالو، و كَالو ليه لا أسي بغيناك نتا طير و دي معاك رباعتك، و رغم اراقة الدماء لكن التونسيين نجحو فداكشي لي بغاو و جراو عليه بطريقة خايبة بزاف، واخا كان الدم هو الثمن الا أنهم عطاو الأمل كبير فالمستقبل التونسي و غير على هادي برافو و ألف برافو و مبروك عليكم و العقبال لينا ... ياه و حنا مالنا ياك عايشين فوق السلك و العام زين؟، و هاد الديناصورات لي باقيين شادين فكراسي الزعامة من عهد الملك الراحل الحسن التاني، لكن للأسف تانرجع نكَولها مرة أخرى نهار لي تخرجو من الفايسبوك و ديرو شي حاجة معقولة هانا معاكم، لحقاش الهضرة لخاوية غير غاتسطيني و مغانفهم فيها والو، فملي تعلن وقفة رمزية باشي يتيرو فاسا من الحكم و تلغا حتى الآخر لحظة علاش مانعرف واخا كانت ناجحة مابقات هضرة، و را كالها واحد السيد ديفو ماشي منهم ديفو جاي منا، ماحدنا كالسين و عايشين فهاد النفاق بينا و بين راسنا كانكولو هضرة و كانديرو وحدة أخرى راك إلا فهمتي شي حاجة غاتسطا بكل تأكيد ... نتلاقاو سيمانا جايا