فهم تسطا : الكَنازة كبيرة و الميت همة!!

فهم تسطا : الكَنازة كبيرة و الميت همة!!


العرج مروان

علاش نخب هاد البلاد السعيدة تاتقلب على فؤاد عالي الهمة كلما غبر؟، و علاش متابعين خبارو من الألف للياء؟، واش الهمة هو هاري بوتر المغرب لي بالهراوة السحرية ديالو تايحقق المعجزات، و ما كاتحرك السياسة و قرارات هاد البلاد إلا بيه هو؟، واش بصح هو دينامو السياسة المغربية و لا الفراغ السياسي لي كاين هو لي خلا عمو فؤاد ثاني رجل فمملكة محمد السادس؟، واش غبرات الهمة مرة مرة تكتيك أم استراتيجية؟ واش اختيار و لا ظروف مبززة عليه يغبر مرة مرة؟، واش مريض و لا الملك غضبان عليه؟ واش تايغبر باش يعتازل السياسة فمرة، و يايتنادم معاه الحال وتايرجع عاوتاني؟...


ماتاتهمنيش هنا هاد الأسئلة ولا شنو هي الإيجابات عليها بقد لي تايهمني العقل السياسي لي جايب هاد الأسئلة حول رجل واحد هو ولد رحامنة فؤاد عالي الهمة ... فواخا الملك حاول، من نهار كَلس فوق كرسي العرش 11 العام دابا و الصرف، أنه يقطع علاقتو بشي حاجة سميتها الرجل القوي فالمملكة، و لي كان البصري شادها، و بدل وزراء الداخلية لكثر من 6دالمرات، كرسالة واضحة على رغبته الأكيدة في قطع علاقته مع الماضي من الجدر واخا ماشي 100%، فهاد الناس لي تايديرو زعما شي تزعليك تايسميوه سياسة صنعو بصري جديد، راجل صحيح جديد، و بيه تايقيسو التغيرات لي تاطرا فالمشهد السياسي المرون... هنا تانلقاو راسنا أيضا قدام مبالغة كبيرة في تقدير حجم الهمة و قوتو و نفودو فالدولة، و بعض هاد القوة صنعاتها ليه غير القفوزية الزايدة ديال السياسيين المغاربة، لي تاندعيو الله ليل نهار أنه يفكنا منهم، و لي كانو أو باقيين تايلجؤو للهمة فكل كبيرة وصغيرة و يحاولو يختاصرو طريق لكراسا ديال الرباط السخان لي داخلين للسياسة على ودهم.

السياسيين فهاد البلاد تايتصرفو بحال أيتها واحد فالشارع، تايمشيو لأسهل تفسير للأحداث (فلان و لا ترتلان كان من مور هادشي)، حتا واحد ما باغي يضرب تمارة و يفك خيوط السياسة المغربية المشبكة بحال عش بوصيحة، و يقلبو على شنو هي الأسباب الحقيقية من مور هاد القضية و لا هاديك، واخا راهم النخبة يا حسرة، كما أنهم يكَولو الهمة من مور هادي و لا ديك تايهنيهم و يخرجهم من باب واسع، لحقاش عارفين بلي السياسة تاتصنع من مور الحيط و فبلايص سرية بزاف تايعرفوهوم غير لي شادين القرار بالمعقول فالمملكة،... متافق معاكم الهمة بان ملي وصل الملك للحكم باعتبارو هو أقرب واحد ليه من صحابو، و لايني الواقع تايكَول بلي ناس أخرين قرابين من الملك كانو من مور قرارات مهمة فالبلاد و أن بعض أفكار الهمة ماعجباتش صديقه الملك.

القرار السياسي فأي بلاد و كيما كانت، ماتتحكمش فيه الإعتبارات الشخصية بوحدها، و لايني بزاف ديال الحوايج تادخل فيه، و ملي تايكَولو شي وحدين بلي الجنون بأخبار الهمة، و الظهور الديالو و غبراته راه ولا مرض سياسي فالمغرب، و أن السياسين ديالنا قايمين كَنازة كبيرة و الميت فيها هو الهمة، فهاد الناس باغيين يداويو هاد المرض و يتحررو من القضية ديال المكتاب، الهمة ماتايصنعش كلشي فالمملكة، كيما الماجدي ماشي هو لي تايحرك الخيوط كاملة ديال المال و الإقتصاد المغربيين، و مكي الصخيرات ماتايداويش كَاع الأمراض، و تلفزيون المخزن ماتايكَولش الحقيقة، و عبيبيس وزيرنا الأول مادايرش خدمتو، و الطبيعة را فيها البيض و الكحل، و المغرب إلا فهمتيه غاتسطا بكل تأكيد ... نتلاقاو سيمانا جايا.