زيزوار : الإشتراكية غير فالزرواطة

زيزوار : الإشتراكية غير فالزرواطة



الإشتراكية غير فالزرواطة

بقلم: سامي المغربي

الكل كيعرف بأن المغرب بلاد ما عمر كانت فيها رائحة الإشتراكية ، و من ديما تابعة الرأسمالية فكل حاجة من لكبيرة لصغيرة، رغم أنه الحكومة الأولى ديال التشقلب ،أو التناوب اللي جاية من كل واحد يساين نوبتوا، كانت إشتراكية بقيادة اليوسفي، و من ديك الوقت الأحزاب اللي كا تقول أنها إشتراكية و كا تشارك في الحكومة كا يقلبو على شي حاجة اللي يعمموها على الشعب و تكون حق على الجميع و يستفد منها الكل، من القاري و اللي ما قاريش و من الموظف للعاطل، و من الفلاح للعامل و من التلميذ للأستاذ،من نساء ورجال،و من شباب و شيوخ .



وفعلا فهاد السنوات الأخيرة لقاو حاجة وحدة يشركو فيها المغاربة و هي الزرواطة، حيث مؤخرا ولات شعار الدولة الأول الزرواطة من حق الجميع، كيفما كان و فين ما كان، من قدام البرلمان حتى لعمق أعماق الريف و الأطلس و الجنوب و الشمال، فين ما مشيتي كاين الزرواطة و الهراوة. اللي بغاها و اللي مبغاهاش.

إوا شفتوا دولة إشتراكية ديال بصح و لكن غير فالزرواطة، الله إنزلها عليهم فهاد لعواشر ديال النصارة