فهم تسطا : المخزن و لا ذكي ... كلا نيشان غير بالمهل!!

فهم تسطا : المخزن و لا ذكي ... كلا نيشان غير بالمهل!!



المخزن و لا ذكي ... كلا نيشان غير بالمهل!!



مروان العرج

"نيشان" المجلة، المجلة الأسبوعية المثيرة للجدل توقفات عن الصدور خبر صادم وصل عدد من المتتبعين صباح الجمعة لي فاتت، و لي غادي يكون فرح الخوانجيا ديال "البيجيدي" (العدالة و التنمية في الرواية الرسمية)، و لي كانت "نيشان" ديما خارجا فيهم و ديما فاضحا التناقض لي عايشين فيه إخوان ابنكيران، كيما فرحات عدد من الأصوليين فالبلاد، و علاش وقفات؟ ياك ما شي حكم قضائي جديد هذا؟ أبدا... المشكل هو أن المخزن طور الأساليب ديالو أو ولا دكي و طبق حرفيا ديك القضية ديال "بالمهل يتاكل بودنجال" و بالمهل كال "نيشان"، كيفاش؟


المعروف على "نيشان" وهادشي لي ميزها على الأسبوعيات لخرين أنها كانت ديما كاتجبد المواضيع "لحشومة" بجرءة قل نظيرها و بمهنية عالية جدا؛ و أنها ديما كانت تادق على المخزن خصوصا "السدة العالية بالله"، و كان بنشمسي ماتايكملش العام إلا و تصادرو ليه علأقل ثلاتة الأعداد فالعام، آخرها كان عدد غشت 2009 لي دارو فيه سطونداج حول حصيلة عاهل البلاد ف10 سنين من الحكم و لي كانت النتيجة ديالو ايجابية جدا حيث فاتت 92%، و لايني المخزن الله يهديه ماباغيش تكون الملكية موضوع استطلاعات رأي واخا تكون النتيجة ايجابية 100%، و ملي "عيق" ابشمسي على المخزن لي ماتيتحاملش مع شي حاجة سميتها الصحافة حفر ليه حفرة عمرو مايطلع منها. و بما أن قضية إعدام الصحف المغربية (أخبار اليوم، الجريدة الأولى، المشعل ...)، شوهات صورة المغرب فالخارج مشا المخزن لأسلوب خطير جدا، هو أنه مشا شد فاليد لي ضارا جميع المطبوعات المغربية، "روبيني ديال الإشهار"، سدو الإشهارات ديال الدولة على نيشان و بالتالي بدا ابنشمسي كايخسر كل شهر فلوس صحيحة و هادشي لي بان فاش رجع لسوق أرشيف نيشان تايتباع غير ب5 الدراهم، قاوم لمدة شهرين و الله غالب صرف مستحقات الصحفيين لي معاه و سد المحال... هنا تايبان ذكاء أو غباء المخزن و الأسلوب الجديد ديالو فاعدام الأصوات المزعجة فالبلاد ... أو واخا كاين بزاف ديال الناس لي مامتافقينش مع الخط التحريري لي كانت غادا فيه "نيشان" إلا أنها فعلا خسارة و خسارة كبيرة للمشهد الصحفي المغربي و هذا دليل على أن حرية التعبير غير شعار خاوي فين ما كان شي لقاء رسمي تايعاودو يعجنوع و يزوقو فيه و يكولوه ... واش المغرب بلا "لوجورنال إيبدو"، "نيشان"، "تيلكيل"، "أخبار اليوم"، "الجريدة الأولى"، "الحياة الجديدة"، و لا غيرهم من المطبوعات المغربية هو مغرب مزيان؟ الجواب كاين فتقرير لمنظمة هيومن رايتس ووتش و لي جا فيه: "تدهورت أوضاع حقوق الإنسان بشكل عام في المغرب عام 2009/2010 على الرغم من أن البلد لا يزال يتوفر على مجتمع نشيط و على صحافة مستقلة.."، من بعد هادشي شنو باغي المخزن من هادشي، راه غير تايسد الفجوات لو كايدخل منها شويا ديال الضوء للبلادنا لي تايعيش فواقع كحل بسبب تراجعها في سلم الإنفتاح السياسي، و الإقتصادي، و حتى الإجتماعي ... المخزن بهاد التصرفات تايقتل الأمل في مغرب آخر ... المخزن تايلعب بالعافية و للأسف ماكاينش لي ينصحو و لا يكَوليه ها صح و ها الخطأ و زايدينها بالفوحان ديال مصطفى العلوي فالأولى، و الفوحان ديال الصامت الرسمي باسم الحكومة، بلي المغرب كايتمتع بهامش كبير ديال حرية التعبير ... و هادشي لي طرا لنيشان؟ ... حرية تعبير عضيمة هادي ..