فهم تسطا : لا فصحى لا فرنسية ... اللغة المغربية هي الدارجة!!

فهم تسطا : لا فصحى لا فرنسية ... اللغة المغربية هي الدارجة!!


مروان العرج

قبل ما نبدى نبغي نشكر كل القراء الأوفياء لي تفاعلو بشكل كبير مع مقال سابق ديالي، و لي كان العنوان ديالو "العربية في خبر كان ... الفرنسية هي اللغة الأولى فالبلاد"، كاين لي تافق معايا و كاين لي ماتفاقش، المهم أنانا ناقشنا و تافقنا و اختالفانا، خلاصة الموضوع للي ماكانش قراه هو إشكالية تعامل أو احتقار المغاربة للغتهم الدارجة المغربية الأولى، و الفصحى العربية الثانية، على حساب الفرنسية، لكن لي خلاني نزيد نكتب فهاد الموضوع الآن هو أن شي وحدين كَالك حتى الدارجة هي طمس للهوية المغربية ماشي غير الفرانسوية، وافهم!!! هنا تايبان بلي موضوع اللغة فالمغرب موضوع عويص و أنه كاينين شي ناس لي يقبلو فالفرانسوية، و مايقبلوش بالدارجة كلغرة مغربية و لي هي لي تاتحدد هويتنا الثقافية، و لي حتى واحد مايمكن ليه ينكر، و حتى من الناس المعارضين ليها أنها هي لغة التواصل الأولى عند المغاربة، كلام جميل ولايني فين المشكل؟؟


المشكل و ما فيه، هو أنه كَالك بلي الناس لي باغيين يقننو الدارجة عوالين يطمسو "الفصحى" على حساب لغات أخرى على راسها الفرنسية!! وايلي... إييه زد على أن هاد الموضوع تكَال فيه بزاف، و تكتب عليه كثر، و دار منتدى على قدو العام لي فات، و لي نظماتو مؤسسة زاكورة، و هو المنتدى لي لقا انتقادات واسعة من المدافعين عن الأمة العربية الموحدية "الوهمية"، رغم أن المنتدى ماخلا لينا مانكَولو عليه، جاو ليه علماء كبار فكل المجالات، ولسانيين من العالم كامل، كما أن هاد الإنتقادات لي موجهة ليه، و للناس لي تايدافعو على الدارجة كلغة مغربية قحة ديال كل مغربي، (أمازيغي، عربي، متعدد الهويات، و حتى هادا موضوع آخر نايض فيها شلا صداع و غادي نتطرقو ليه فالأيام جايا)، و لي كايأكدو على أن الدارجة جاية لإبادة العربية الفصحى، واخا الدارجة حسب عدد من اللسانيين هي أقرب اللغات إلى العربية، خاضعين بطرية و لا بأخرى لأمر الواقع، فنفس الشخص لي تايدافع على الفصحى و لي مانكروش بلي حتى هي لغتنا و نعتزو بيها لكنها لغة خاصة بالمتعلمين، كايستعمل الدارجة فحياتو كاملة، و حتى الدولة كَاع خضعات لأمر الواقع و لات فين ماتبغي دوز شي رسالة لهاد الشعب المغرلوب على أمره تاستعمل الدارجة فالتلفازة خ فجميع الإشهارات، و حتى حزب العروبة لي بنى المجد ديالو على الدفاع عن الفصحى كلغة رسمية للبلا، (وولادو ماتيفرقوش بين الييف و الزرواطة)، حزب الإستقلال، و لا تايستعمل الدارجة فكلشي خصوصا فالحملاتو الإنتخابية، الحمد لله بعدا ملي فهمو هاد الناس بلي إلا بغيتي المواطن يفهمك خاصك تهضر معاه بلغتو
اللغة الوطنية ديال المغاربة اليوم هي الدارجة، هادا مابقاش طرح بل ولى اعتراف واقعي، ما بقا لينا غير تومي لغة رسمية و كثر من هادشي تولى اللغة المعتمدة رسميا بالنظا التعليمي المغربي، للتعلم جميع المواد على راسهم العربية الفصحى!!، وهادشي كولو ماتايعنيش أن المغاربة نكرو الفصحى، مع العلم أن حتى شي شعب عربي ماتيهضر بيها كولا و تايهضر بلغتو و لي تاتسمى (العامية)، و حتى اللسانيين كايكَولو أن الوسيلة الناجحة باش أي واحد يتقن شي لغة هي يتعلمها بلوغتو الأصلية لي تعلمها فكرش مو و لي هي اللغة المغربية ديالنا الدارجة

الهدف من هادشي كامل ماشي هو نسف "الفصحى"، لحساب الدارجة أو الفرنسية!!، بل الهدف هو نعطيو لكل لغة حقها و المكالنة لي تاتستاحق على راسها لغتنا الأم لي مشكلة عقدة عند شي و لي إلا فهمتي عالش غاتسطا بكل تأكيد، و تولي محط فخر و اعتزاز و كيما كاينة الفرنسية و الإسبانية، و الإيطالية، ... تكون اللغة المغربية ديال المغرب و الغاربة كَاع ... نتلاقاو سيمانا جايا.