فهم تسطا : العربية في خبر كان ... اللغة الفرنسية هي لغة البلاد الأولى!!

فهم تسطا : العربية في خبر كان ... اللغة الفرنسية هي لغة البلاد الأولى!!


العربية في خبر كان ... اللغة الفرنسية هي لغة البلاد الأولى!!

مـروان العرج


ملي خرج الاستعمار من المغرب السعيد خلا لينا بزاف دالبيض هاد البيض فقس شحال هادي و خرجات منو مخلوقات عجيبة و ممسوخة، و هاد المخلوقات هي لي كاتصر اليوم على اعتبار اللغة الفرنسية هي لغة البلاد الأولى، و زيد على هادشي أن معضم المغاربة فين ماكايمشيو لأية إدارة عمومية مغربية، كايلقاو أن هضرة الدستور أسمي و أقدس قانون فالبلاد مجرد ورق فازك تايمسحو فيه رجليهم و تايكولو بلي اللغة الفرنسية هي اللغة الرسمية للمملكة... صراحة مايمكنش نلومو تلاميذ و خرجي البعثات الأجنبية و لا المسؤلين "المفرنسين" و لا كيما تايبغيو يكولو "فرنكفونيين" لي تايمثلو النخبة الفرنكفونية فالبلاد، و لايني عجب العجاب حقا أن تصادف في الشارع أحد القاطنين بدريبة ضيقة وسط حي شعبي فالمغرب العميق، و لي ما يوصل لدارو حتى ينقز فوق العشرات ديال القطوط المتشردة، و يدوز علي العرارم ديال الزبل (حشاكم)، و لايني كايبغي يبان هو الآخر متحضر كتر من المتحضرين، و يبدا يدوي بواحد الفرانساوية عوجة كاتقتل غير بالضحك، الوضع هنا تايشبه لحد كبير الوضع لي تايعيشوه ملايين الهنود لي تايبغيو يبدلو الجلدة، و لهاد السبب تايستوردو ملايين الوصفات الطبية لي كاتساهم فتبييض الجلد، و هادشي تايتأكد ملي نعرفو بلي فنيودالهي بوحدها كاينين مئات الصيدليات لي تاتبيع مراهم خاصة بتبدال لون الجلدة من الأسود القاتم للأبيض الفاقع، و كل نهار تاتوقف طوابير طويلة باش يبيضو جلدتهم علاش مانعرف؟؟!!!


حنا فالمغرب تانعانيو من مشكلة كبر، واخا ماباغيينش نبدلو الجلدة إلا أننا باغيين نطمسو هويتنا بالكامل، يعني حنا أسوء حلا بـ4000 درجة من الهنود، لي حققو ديمقراطية صحيحة و صيفطو أقمار صناعية للفضاء و غزاو العالم بمنتوجاتهم الإعلامية فائقة الدقة، هادشي بلا مانهضرو علي منتوجاتهم السنمائية، أما حنا فين مامشينا تانفوحو فالفرنسية، و ماقادين نصنعو حتى نصف برة، و من أمثلة هاد الضاهرة و لي تاتقتل بالضحك، كانشوفو أنه في السوق الممتاز مثلا كاتعيط عاملة الاستقبال عبر مكبرات الصوت على موظف من لي تاسيتفو السلعة، و لا عاملة نظافة، و كاتستعمل لغة فرنسية ركيكة و مضحكة باش تعيط ليهم، الغريب أن السوق الممتاز ما فيه حتى شي أجنبي و حتى الا كان آش من سوق عندو فعاملة نظافة سميتها الضاوية، و لا عامل آخر سميتو بوعزة.

احتقار لغتنا الدارجة المغربية الأولى، (واخا كاين شي ناس لي ماباغيينش دخل ليهم لراسهم بلي الدارجة هي لغة المملكة الرسمية و هي لي تاتحدد هويتنا)، و الفصحى كلغة ثانية كاتدفع الآخرين الى احتقارنا، والكل باقي عاقل نهار زبلها عمي عبيبيس الوزير الأول ديالنا الهمام وهو كايخطب أمام رئيس وزراء الصبليون خوسي لويس ثباتورو، و قلب سميت الراجل لمرأة، ثم اعتذر بفرنسية لا توحي بأنه وزير أو بالأحرى رئيس وزراء، هاد الواقعة خلات الصبليونين يضحكو علينا حتى الدموع سالت من عينيهم هوما تايشوفو "وزير أول" تايخطب بفرنسية عوجة، و ديك الساعة آش داك لشي فرانسوية أبا عباس العربية كانت غادا تكون حسن و هي واقيلا ذات اللغة لي كنتو تادافعو عليها من قرن و زمارة هادا كاستقلاليين و لا صافي قلبتو الفيستة؟، كما تحضرني واقعة وحدة أخرى في إحدى الندوات فطنجة عقدها الإتحاد المتوسطي، ناض فيها واحد الصحفي شاب و كَل للمنظمين "لماذا تتحدثون فقط بالفرنسية مع أنكم في المغرب و مع أن نصف بلدان حوض المتوسط عربية، و لماذا تفرضون علينا لغة واحدة هي الفرنسية دون الإستعانة حتى بالمترجمين!!؟"، جاوبو "روجي أوكي" و هو أحد أنصار الكيان الصهيوني تطرفا "أنت الذي أتيت لتفرض علينا العربية"، جاي عنك لبلادك و فارض عليك لغتو و زايدها ليك بالمعيور من الفوق و حنا ساكتين، و الا فهمتي المغزى من هاد الصمت الرسمي و الشعبي غاتسطا بكل تأكيد ... نتلاقاو سيمانا جايا .