فهم تسطا : الشتا هي سباب المصايب ... هوما ماعليهم والو!!

فهم تسطا : الشتا هي سباب المصايب ... هوما ماعليهم والو!!


الشتا هي سباب المصايب ... هوما ماعليهم والو!!

مروان العرج

الماء مرة أخرى يصنع الحدث فمغرب القرن 21، صور الناس تاتغرق، و ناس أخرين هاربين من أمطار الخير لي عمت المملكة، زد عليها صور ناس أخرين تايخرجو الما من ديورهم بعد ما هجم عليهم، و إلا جمعنا هاد الصور كاملة غاتعطينا صورة كبيرة حقيقية لأجمل بلد في العالم، بلاتي!!! ماشي غير هادشي الوديان لي يبسات مند أمد حتى هي صنعات الحدث و فاضت على عباد الله و جرت معاها الإنسان و الحيوان و آخر ما دات حافلة لنقل عمال أحد معامل بوزنيقة، و لي مات فيها 27 عامل شاب ذنبهم الوحيد أنهم اختارو الخروج من بؤس مدينة ابنسليمان لي خرج عليها البصري، و ما خلا فيها حتى شي معمل فين يتحركو شباب المدينة الصغيرة لي تاتكبر نهار على نهار، و اشتغلو فداك المصنع لي معاقد مع شركة جماني للحافلات، لكن الأقدار جرت بما لا تشتهي رغربتنا فجرف الوادي طريق با غلاب مول مرونة السير العجيبة و مول طرقان المملكة المثقبة، و انزلقت الحافلة في الوادي و من بعد ماتو الشباب الأبرياء، و المصيبة هي أن مصطفى العلوي (مول حوار ماشي مول الأسبوع)، مابقاش تايعلق على مثل هاد الأحداث أما كون خرج بشي تعليق فشكل بحال "و ها هم رعياك يا مولاي خرجوا عن بكرة أبيهم فرحين بأمطار الخير فادين المغرب بأرواحهم".



المغاربة تسناو الماء من شحال هادي، و من مور عقود من الجفاف جوج قطرات ديال الما غرقاتهم، و من بعد كثر من 50 سنة علي الإستقلال، المغاربة مازال غارقين فكلشي فالما، الفقر، الأمية، المرض، البرد، الصهد و الويل الكحل، تاتجي الشتا تاتقتل، كايجي البرد كايقتل، كايجي الصهد كايقتل، كايجي الزلزال كايقتل، كايجي المرض كايقتل، حتى بديت نتساءل علي أهمية شي حاجة سميتها الإستقلال، و في ظل هادشي كامل كانكَولو كيفاش 50% من المغاربة مراضين نفسانيا و على راس هاد الأمراض القلق!!، كيفاش باغيين المغاربة يبقاو طبيعيين و هوما تايشوفو البلاد تاتسرق عاين باين بدون حسيب أو رقيب...

فالمغرب كولو و طيلة هاد السنوات كاملة من الجفاف و شح الأمطار، تحولات وديانو بقدرة قادر إلى مناطق سكنية، و تحولات مناطق جغرافية خطيرة إلى مدن عامرة بالبشر، و سهول فلاحية ولات مدن جديدة مشركات عقارية دخلات منها الصرف دالمعقول، هادشي إلى جانب استمرار المسؤولين لي عندنا في بناء مدن الملح و لا رمل جديدة تاتغرقمع أول جغمة ماء كاتقيسها، و المخزن حتى هو مامقصرش و الله يجازيه بالخير، مغمض عويناتو علي بزاف دالحالات ديال الفساد و الرشوة و انخراط المسؤولين في تحويل المغرب إلى فوضى، وولا الغش و التدليس أساس المعاملات عند هاد الناس، بانيين عمارات كَد الخلا مع قوادس صغيرة ديال واد الحار، بانيين آلاف الديور فبلايص مخصصة أصلا لفيلات، كاينين آلاف الكاريانات فوق مجاري لوديان تصرف مياه الأمطار، تم تدمير قوادس الحديد لي خلى الاستعمار و دارو بلاصتها قوادس دالبلاستيك، كايطردكَ كيف تقيسو، الزبل حشاكم فين مامشيتي خانق نفس القوادس الجداد، و الشتا هي المسؤولة على هادشي، المسؤولين مساكن ماعليهم والو!!!!!

أسيادنا، المسؤول الأول علي هادشي كلشي لي طاري دابا فمملكة محمد السادس، هو الفساد، و الغش، لي كاينخر البلاد من الإستقلال لهنا، تسرقت فلوس صحيحة كانت قادا تخلي المغرب فعلا أجمل بلد في العالم، ولايني لي تايبان هو أن الشفارة الكبار هوما لي عايشين فأجمل بلد في العالم، أما حنا ما نسمى في أعرافهم بكحل الراس عايشين وسط الويل و الأمية و ما نعرف شنو آخر، و فكل مرة يتعرض المغرب لنكبة علينا أن ندرك بلي المسؤول على هادشي هوما الشفارة لي خواو صناديق الشعب من الميزانيات، لحقاش الشتا بريئة مما يجري، نقطة نهاية، لحقاش كَلت ليكم إلا فهمتوا شي حاجة فهاد المملكة السعيدة غاتسطاو بكل تأكيد، و دابا وقفتو على هضرتي؟ ... نتلاقاو سيمانا جايا