فهم تسطا : الصبليون ... الله ينعل جد بوها جورة هادي!!!

فهم تسطا : الصبليون ... الله ينعل جد بوها جورة هادي!!!



الصبليون ... الله ينعل جد بوها جورة هادي!!!

مروان العرج

الصبليون جيرانا و عزاز علينا و على قلوبنا، ولايني الإشكال هو أنهم ماتايفهموناش تانعطيوهم الحوت و تايعطيونا الخردة ديال السلاح المخرشش، كانعطيوهم الحراكَا باش يهلكو عمرهم في بناء القناطر و الجسور و جميع ماطيشة، و تايتاهمونا بدفع شبابهم للبطالة، و كل نهار تايلقيو الأوامر بجمع عدد محدد من الشباب المغربي، بحلا باغيين يفكرونا بيامات لاراف جينيرال أيام الحسن الثاني المجيدة، و المشكل الكبير هو أن الصبليون عارفين مزيان بلي ماكاين حتى شي صبليوني يقبل يخدم فماطيشة و لا الفلاحة بشكل عام، زد على هادشي كانعطيوهم الحشيش باش يطلعو المزاج، و يواجهونا بحملات إعلامية كاتهمنا بالغدر، رغم أن الحشيش المغربي ضروري لإستمرار الشعب الإسباني الشقيق في فرحه العارم، لو كان فرانكو تايفكر و دخل لسبانيا بأطنان الحشيش كون نتاصر بلا حرب و لا دمار و عوض أن يتبادل الملكيون و الجمهوريين التقرطيس يتبادلو الجوانات.


الحشيش و الحريكَ و الحوت ماشي كلشي، الصبليونيين تايشبهو لسكان المريخ الأولون، جاو يالله يكتاشفونا مع أن النص فيهم عندهم دم مشترك مع المغاربة و الفضل فهادشي لثمانية قرون من يامات العز فالأندلس، كما أن أكثر الناس جهلا بالواقع المغربي هم الصحفيون يعني الفقيه لي نترجاو براكتو دخل لجامع ببلغتو، فالصحف الإسبانية مزال كاتسمي الشعب المغربي بالشعب العلوي، و هوما لا يفرقون بين أسرة حاكمة و بين شعب ينتمي لبزاف دالقبائل و الأصول، و كثر من هادشي كاينين شي أشباه صحفيين "علماء" كثر من القياس تايسميو مطار محمد الخامس بالمطار العلوي و ميناء طنجة بالميناء العلوي، و حتى الواقواقيين لي عمرهم ما كانو ماغايديروش هاد الخيلوطة بين نسب عائلة حاكمة و بين شعب سميتو الشعب المغربي، و هاد الصحف لي تاتكول على راسها مهنية هي لي غطات الأحداث الأخيرة فالعيون و لي طبلات وزغرتات فيها للبوليزاريو ضد المغرب، زعما هادي هي المهنية و إلا فلا.

هاد الأيام ناضو نفس الصحفيين و نشرو صورة طفل لقي حتفه في مجزرة غزة الصامدة، و كَالو بلي هاداك الطفل مغربي و "القواة المغربية الضالمة" قتلاتو بلا رحمة و لا شفقة، كاين شي دغل و نفاق و "مهنية" كثر من هادي أبدا... أجي بلاتي مادام الصحرا المغربية حيدتو ليها ديك الميم وولات "غربية"، (مع أن هذا المصطلح حتى من الناحية المهنية خاطئ لأسباب ضيق المساحة مامخلينيش ندخل فيها ولايني غادي نرجع لهاد الموضوع فالأعداد القادمة من فهم تسطا)، واحد الشعب الباسكاوي الشقيق، المحاصر فأراضي الباسك، آش خبارو و علاش ماتاتجبدوهش فالتقارير الصحفية المهنية ديالكم و كاتعطيوه حق ماشي ديالو بحال لي عاطيينو للبوليزاريو، هادشي بلا مانهضر علي شحال من اشكالية و مشكلة فبلاد الأندلس لي إلا فهمتي شي زفتة فالخطابات ديالهم و الواقع الإعلامي عندهم لي مرمدو بالمناسبة الطيب الفاسي الفهري لي بعدا دار شي حاجة زوينة فحياتو غاتسطا بكل تأكيد!! ... نتلاقاو سيمانا جايا