فهم تسطا : غلاب و نهاد و الجزيرة و المدونة ... داروها بيك أغليليب

فهم تسطا : غلاب و نهاد و الجزيرة و المدونة ... داروها بيك أغليليب


غلاب و نهاد و الجزيرة و المدونة ... داروها بيك أغليليب

بلافران/ مروان العرج

غلاب (وزير النقل ديالنا شكون من غيرو)، بقا تايضارب و حلف مايسالي العام حتى يخرج مدونة السير العجيبة ديالو، مدونة بعقوبات خيالية كاتدي للحبس كَاع... و من أهداف هذه العقوبات حسب الوزير الإستغلالي عفوا الإستقلالي فهي الحد من الرشوة و احترام قانون السير يعني احترام المدونة الجديدة و السلام... مزيان، نيت من نهار بدات و بنادم خياف على راسو... و لايني فين كاين المشكل هادشي كلو مزيان من واحد الناحية، و بيناتنا هادشي لي يصلح لينا حيث المغاربة شعب كاموني كاطلق ليه السمطة تايدصر شويا... و لايني الغريب فهادشي كامل هي المادة لي صدماتني و هي المادة 93 و لي جا فيها أنه "يجب على كل راجل عند استعماله الطريق العمومية (ماشي الخاصة) اتخاد الإحتياطات الازمة لتجنب كل خطر سواء علي نفسه أو على الغير"، و جابت هاد المادة أيضا غرمات من 25 درهم حتى لخضرالاف ريال (50 درهم) للراجلين لي ماكايستعملوش الممر الخاص بيهم باش يقطعو الشانطي ... ماشي مدونة عجيبة هادي!!!


لكن الأغرب فهادشي كامل هو أنني اكتشفت بالصدفة بلي مرافق مع اليد ليمنة ديال غلاب و هي واحد الصديقة لي فين مانكونو خارجين لشي قنت و نبغيو نقطعو شانطي كاتكَولي تسنا حتا لباسون (ممر الراجلين) خاصنا نحتارمو القانون شويا... و ديما كاتهددني بلي الا كانت وزيرة غادا دير بروصيات للبشار لي غادي على رجليه، من طبيعت الحال ماكنتش تاندي عليها لحقاش نهاد معروفة بالتسطية ديالها (كثر من الباتول لفضولية ديال مجلة نيشان المعدومة) الا أنني اكتشفت فيما بعد أن الحماق عطاهم الله فهاد لبلاد يا إما أنا وحدي لي مسطي وحدة فزوج ...

كما أنه مايمكنش تكون مصادفة هادي ديال نهاد لي مامسوقاش كَاع لآش طاري فالبلاد تكَول خاصنا نديرو بروصيات للراجلين و تكون حتا غليليب فراسو ... مايمكنش!!! ... المسخوطة دايرة هبل تربح و خداما مع با غلاب، و غادا تكون هي لي وصلات ليه الإقتراح الجهنمي ديالها و لي عجبو و قنع بيه جدهم الأكبر "عمي عبيبيس" و زيرنا الأول، قبل مايدووزو لبر لمان و يخرج لأرض الواقع!!!

دابا بيناتنا واش هاد البند غادي يحد من الرشوة و يرغم المواطن أو الرعية في الرواية الرسمية، على أن يحترم المدونة العجيبة أكيد لا و دلائل على هادشي عطاها الله و كمثال ... واحد من "لابيل" أو دراوش هاد لبلاد السعيدة خارج مع 7 دصباح فجيبو 20 درهم، طالع ليه الدم، ماكاميش مناكَر مع المرا، و 3دنفوس فالدار تايتسناو يجيب ليهم ماياكلو، أو وسط هاد المشاكل كاملة نسا مادازش من "الممر"، شدو بوليسي و خيرو ما بين بروصي د 25 درهم و البنيقة آش غادي يدير هاد الدرويش؟؟ ... غادي يقسم معاه الـ20 درهم و ماكاين لا كوسطا لا هم يحزنون... هادي فلتات ليك أبا غليليب و نيت را حتا نتا شدوك ماكاتحتارمش المدونة لي صديعتي لينا بيها راسنا عاماين هادي، شدوك أ معالي الوزير سي غلاب فهاد يوماين بالضبط فطريق كازا الرباط، و راك درتي 16 مخالفة لي شدك فيها الردار، و هادشي كامل مسجل بالصوت و الصورة فأرشيف الجزيرة القناة القطرية المثيرة للجدل، داروها بيك أ معلم، 15 ليوم الا ماخلصتيش البروصيات غادا دوز فضيحتك فالحصاد المغاربي، و هاد الهضرة را جايبها من مصدر موثوق جدا من داخل الجزيرة ... وا شتي لي تبع نهاد فين تايوصل، نهاد ماعندها مايدار أو مدوخة 30 مليون دلمغاربة لي موكلين عليها الله، و نيت ملي مول المدونة مايحتارمهاش غاتبقا فاهم سي حاجة؟ غاتسطا بكل تأكيد ...